中國歷史會不停重演,但世界歷史只會繼續向前

每當言及香港獨立,大多數人都會認為主張激進,輔以諸多理由否定,但當反問佢地喺現行局面之中,可以點樣爭取民主自由,大眾往往都係啞口無言,忽然失語。呢種情況之所以常見,係源於大家都未意識到獨立從來只係手段,而非目標,同時太受中國灌輸嘅歷史框架所影響。事實上,只要大家認清兩點:一、香港嘅終極目標係爭取自由,以及二、中華文明以及中共體制嘅核心都係反對自由,咁就會更易理解獨立作為手段之必要,而獨立路上嘅各種抗爭模式都自有意義,毋須內耗。

要洗刷香港人對獨立嘅恐懼,首先要談論香港人以至世界嘅選擇性失憶。自中共開始部署奪取香港起,香港人嘅國際視野亦都開始自我設限——由港英時代嘅冷戰思維,逐漸倒退至中國主導嘅華夷秩序,格局日窄。過去,香港雖未至於喺國際間舉足輕重,但至少喺東亞及東南亞區域佔有一定地位,東西陣營前哨站之名,可謂當之無愧,因此從來都廣受世界關注,亦係世界窺探中國嘅最佳窗口。其後,英國一方面內外交困,自顧不暇,一方面又誤以為中共將會改變,香港落入中共之手,香港就成為西方掌握中共進步幅度嘅實驗場。至此,香港可以話係中共測試西方反應嘅緩衝區,英美檢驗自身眼光嘅參考對象,亦係美國試探中共同世界秩序距離尚有幾遠嘅試金石。

因此,自香港前途商議有成之後,英美社會都一直密切留意以及討論香港局勢,而主權移交前嘅兩個月,《紐約時報》一篇名為〈救助香港〉嘅社論就直接提到香港嘅價值。「而家,美國要挺身而出,阻止香港嘅自由社會遭受破壞。而香港嘅主權移交,只係重大問題嘅其中一部分。呢個更重大嘅問題,就係中國將會以強國姿態擠身強國之林,呢個恐怕係現代世界所迎接嘅最艱鉅挑戰。十二億人口同不斷發展嘅經濟,加上渴望成為軍事強國嘅志向,中國將來勢必成為美國嘅對手。」中共接收香港背後嘅意圖同佈局,社論作者心知肚明,可見當時國際形勢絕非不明朗,大家都知道中共野心必須提防,只係中共姿態低調,而美國又無意出手,於是以美國馬首是瞻嘅各國都不了了之,靜觀中共變化,香港亦唔例外。

然而,香港人呢種獨善其身嘅態度,就為日後中共嘅為所欲為,大開方便之門。中共以一國兩制之名立約,意在善用香港英治遺產,將香港逐漸塑造成中國版新加坡,協助中共走資,掩護黨內密謀顛覆世界秩序嘅如意算盤,本來計算未至於高明,但多得香港人隻眼開隻眼閉,中共就得以上下其手,任意魚肉,而西方亦因為出師無名而無法插手援救。中共多次干預香港內政,一國兩制名存實亡,但香港泛民議員出訪美國之時,竟然向美方表示香港狀況尚好,力證《基本法》行之有效;中共大推送中惡法修訂,香港司法獨立出現裂痕,但香港百萬民眾上街之後,竟然只係要求撤回修訂,而非爭取完整主權,從根本上遠離中共管治。當香港人自上而下所選擇嘅,都係任由自由社會慢慢腐爛,甚至為中共隱惡揚善,試問即使世上有識之士早有先見之明,又如何提示香港自由之路何來何從?

中共自立國起,就視高舉自由旗幟嘅美國為敵對國,而戰略方向,就係吸納願意靠攏自身嘅小國,逐步擴大勢力,最後一舉殲滅敵對國。呢種模式,其實同歷代中華帝國嘅經營模式一脈相承,而香港就正正係近在中國周邊嘅屬邦,有待收復,繼而重新納入秩序體系,滲透吸收。中共對世界輸出嘅一套,係文化羈縻加以力服人,文化之中所承載嘅核心價值就係最原始嘅權力同暴力,中原地區戰國末年秦國尚未擊敗其餘六國前所刻於竹簡之上嘅《秦律》,就已經具備呢種原始思想——周邊諸國,可分為臣邦、屬邦及他邦三類,臣邦為已經臣屬嘅諸侯國,屬邦為位於國內嘅少數民族,而他邦則為勢力均等嘅敵對諸侯國。中央力量要得以維持,就要臣邦拱衛,現實中嘅臣邦,就係武力上對抗唔到中共嘅中國各省;而需要擴張之時,就需要改造異質政治共同體嘅思想信仰,令屬邦如香港澳門相信,即使文化未能相容,都要記住武力無法對抗中共;當勢力範圍之內亂局已經平定,就係時候動員全國,向絕不屈服嘅他邦發動進攻,一較高下,而美國就係中共嘅終極對手。

每次中華帝國累積力量,呢種一雪民族恥辱嘅對外侵略就會發生,直至發現自己真係比唔上敵對國,敗興而回,就再一次韜光養晦,等待又一次嘅改革開放。漢帝國先係同匈奴保持貿易往來,到武帝時期至出擊匈奴,無法北上之後就議和劃界;唐帝國君主先贏得「天可汗」之名,然後於塔拉斯河戰役大敗於伊斯蘭帝國,無法西進之後就議和劃界;滿清帝國准許廣州通商,因鴉片貿易而對英夷先發制人,無法排外之後就議和賠款——呢啲歷史所反映嘅,就係一個個「改革開放挑戰對方韜光養晦」嘅循環,而七十年間中共嘅發展趨勢,其實仍然不脫中華帝國模式,分別只係世界已經全面開發,美國勢力已經深入亞洲,中共想避開民主改革浪潮,都已經無路可退。有中國學者曾經提出,中華帝國嘅治亂週期以八百年為一循環,但秦帝國立國距今不過二千二百年左右,粗略否定歷史潮流線性發展,以及經歷地理大發現後全球已經連成一體嘅重大改變,立論未免過於樂觀。

相比起迷信中國歷史會不停循環,明白到改革開放只係中共爭取時間積聚實力已為常態,去理解中共嘅改革開放,就會比較容易,因為中共提出富有中國特色嘅社會主義,只係意在稀釋中國進入世界秩序期間嘅本質上不相容,而非誠心求和。中共輸出新世代奴隸,為資本主義世界供應廉價工人以自肥,同時以自由之名掩飾國家暴力,促進資本集中,國內街頭圍板上宣傳嘅中華文明倫理觀,只係誘導民眾賣身工作嘅花言巧語。改革開放迎合以美國為首嘅新自由主義,中國民眾化身世界工廠,表面上係參與緊全球化,實際上則係暗渡陳倉,換取時間同空間去加強國家暴力。三十年間,中共鼓勵工廠興建,然後安插黨員於企業管理層監管營運,一邊粉碎民間自發組織工會機會,孤立工人,一邊以高壓手段阻止工人爭取公義,同時縱容富士康生產模式,放任資本家剝削工人,一邊保持國民生產總值增長,一邊任得馬克思理論中嘅勞動異化分解人性。呢啲西方國家早就經歷過嘅工業革命時代弊端,美國早就了解,但美國之所以對所有暴行視若無睹,就係因為西方國家各大公司都可以從中取利——減低企業生產成本,同時轉嫁環境污染。當中國生產成本逐漸增加,再無利用價值,初生之犢習近平又自以為反擊美國時機已到,二零一九年,就成為咗中國證明自己嘅民族復興時刻,同時亦係八國聯軍聯手關閉過氣世界工廠嘅時刻。

一八四零年至今,中國革命同復興嘅目標都係打擊西方霸權,而非融入世界秩序,因為願意接受美國輸出嘅世界秩序,就意味住主動瓦解以中國為核心嘅國內秩序,而秩序一亂,等同自殺。不論係滿清帝國,定係中華人民共和國,都承受唔到外來秩序對自身秩序嘅徹底調整。正如歐盟要建立,必須消弭德國稱霸嘅野心,秦帝國要建立,必須鎮壓六國國內嘅反動,自由陣營要擴張,亦必須解決反對自由嘅政治共同體,例如中國。中國為世所不容嘅根本原因,就係在於國內缺乏民主自由根基,一切疑似資本主義自由市場嘅表徵永遠都只會係表徵。

另一方面,美國亦係以類似方式攻陷世界,鞏固自身權力,最大分別只係秩序核心係自由,而非暴力。假如美國都有一套朝貢體系,佢所要求嘅就係所有國家都務必接受自由民主制度,以自由國家圍堵敵對國,而日本、韓國同台灣,都係美國嘅臣邦。香港人處於兩套秩序之間,對美國而言,就係心態難測嘅游離政治共同體——到底香港係想成為中共屬邦,致力消除自身西化成分,融入中國,抑或及時投向自由陣營,決心追求自由民主,寧為玉碎,不作瓦全?美中碰撞正烈之際,香港人若然忘記自身定位,忽視可行選擇,所得到嘅下場大概就只有昧於局勢跟錯大隊,最後淪為炮灰。

要民主定賺錢,要親美定親中,其實都唔係最急切嘅問題,因為香港人首要思考嘅係,到底我地想唔想成為炮灰,而如果唔想,思維又可以點樣盡快調整。如果我地渴望自由,就要堅決拒共,而要堅決拒共,就必須以行動證明自己。如果中共志在吸納屬邦去打擊他邦,香港人必須撫心自問,自己要唔要為取悅中共而得罪美國,要唔要為成為中國人而拋棄自由。要自由,就唔可以做中國人,呢點所有流亡海外嘅中國民運人士都心中有數,而中共擺出嘅專橫姿態,亦顯示出中共黨內已有共識,杜絕西方自由思想。根據中國國際問題研究院近日發表嘅〈國際形勢和中國外交藍皮書〉,其中嘅「國際權力日益由西向東轉移」,對美國「一超多強」嘅批評,以及有關「新一輪技術革命有利於非西方國家抓住機遇後來居上,撬動大國實力」嘅描述,可見中共仍然無意息事寧人,接受美國體制優於自身嘅現象。因此,如果香港忤逆中共意願,搵出爭取民主嘅可行辦法,就等同否定中共嘅官方文件,否定中共以暴力征服世界嘅春秋大夢。

故此,獨立與否,反而可以從長計議,因為大家慢慢就會意識到,點樣至係爭取自由嘅最佳辦法。而要掙脫「改革開放挑戰對方韜光養晦」嘅循環,必定要自外於中國。只要有意脫中,路線分歧都無關緊要,因為就算係和平理性反共,勇武抗爭反共,大家日後回望,都會發現原來喺香港獨立路上,彼此一早就係視死如歸嘅忠實戰友,無分高低,因為香港人嘅所有抗爭,都必定係為保護香港核心價值而生。

廣告

今日香港獨立,明日台灣方可獨立

「今日香港,明日台灣」,係香港人最常誤用嘅一句口號,因為香港人一直熱衷於以自己嘅壯烈犧牲,去提醒台灣戒備中共,偏又從來意識唔到,自身嘅真正功能,係透過確立香港獨立,進而為台灣獨立製造機會。由於中國坐斷亞洲,持續擾亂地區秩序,嚴禁台灣獨立,因此,只有今日香港獨立,了結中國統治,他日台灣方會獨立,然後成個亞洲至會得到解放。簡而言之,要真正幫助他人,香港人必須自強自省,而無謂嘅苦行求饒,必須立即終止。

只有消滅中國,真正解放亞洲之日方會到臨,而要完成呢個任務,香港肩負重任,責無旁貸。自鐵幕拉起,冷戰開始,自由陣營與共產陣營一直勢不兩立,其中核心角力,源於自由係咪真係高於一切。目前,我暫時無意拆解自由何以必勝,但只要大家相信自由必勝,就已可預知中國必敗無疑,一如蘇聯之敗亡,避無可避。自從自由陣營成型,美歐日聯防蘇聯,世界嘅規則已經徹底改變——自由成為戰勝嘅唯一資本,得自由者得天下,反自由者失天下,而香港過去一直都係處於夾縫之中,靜觀其變。五十年代,中共緊跟蘇聯方向,一直對外輸出所謂革命,表面上係帶領世界通往烏托邦,但本質上係向自由宣戰,意圖還原過去嘅原始叢林法則——武力強者建立統治,武力弱者為奴為婢,瓦解人類生而平等之說,將人類文明往後拖行。六十至七十年代,史太林死,中共亦意識到自由陣營捍衛自由之意志極之堅決,於是疏遠蘇聯,調整國策,徐圖後計,表面上係態度軟化,但本質上只係策略性撤退,意圖壓迫人類自由以重建帝國之心從未消失。八十至九十年代,蘇聯內外困頓,試圖轉型,但自由之門開得太急,一鬆手即失控,最終倒台,中共則以改革開放路線欺騙西方,爭取時間,表面上係願意接受西方秩序,但本質上只係繼續厚黑,韜光養晦,等待百年馬拉松之後嘅復興時機。呢段時間,香港依附喺英美保護罩之下,尚算毛髮未損,但中共滲透近在咫尺,一直喺地下發揮影響力,香港處境從未稱得上為安全。

中共以極權體制立國,以黨國思維統治,模式七十年以黎從未轉變。無論現今執政者係咪習近平,中共嘅總路線都係以中華帝國姿態崛起,消解人類文明嘅進步里程。所以,只有迫令中國改弦更張,亞洲嘅小國至有呼吸自由嘅空間,而自由陣營嘅邊界先至得以擴張。太平洋島鏈嘅最後一個據點,並唔係台灣,而係可以重擊中國嘅香港,台灣只係一隻已經入陣嘅牌,大家角色從來不一。國共內戰之後,國民黨敗走台灣,價值為保留中華民國之名義,準備隨時反攻大陸。然而,由於美國拉攏中國,對付蘇聯,自尼克遜訪華後,中華民國價值稍為下跌,國際地位亦一直下降,台灣邦交國數量一直減少,就係美國選擇培養中國為可靠盟友嘅結果。好彩嘅係,習近平執政,一改前人策略,急於求成,一度倦勤疏懶嘅美國就猛然驚醒,發現蘇聯雖亡,中共尚在,要鞏固自由陣營,就必須擊敗中共。擊敗中共之後,中國可以潰而不崩,各省獨立可以,聯邦自治可以,只要中共唔再妄圖重現中華帝國嘅光輝,倒行逆施,美國就會放佢一馬,而人類文明亦可以繼續向自由之路進發。

人類文明嘅必然方向係自由,而香港振作,就可以突破缺口,改寫歷史。只有香港獨立,中共倒台,中華民國紙牌先至可以退出歷史舞台,而亞洲大局既定之後,台灣就可以正名獨立,告別中華餘毒。中華文化以儒家文化為宗,其內涵之所以妨礙人類文明發展,在於成套文化係以安定社會而設,並非鼓勵所有人伸張自我。所謂倫理,其實乃係由上而下推動嘅思想操縱,儒家文化從來唔鼓勵人類挑戰制度,獨立思考,如同古埃及嘅社會階級,不合情理偏又行之有效——法老君權神授,王位世代相傳,以中央體制掌管全國,役民不息。成個古埃及社會嘅秩序以武力為基礎,掌有武力者則稱王,如同中華帝國興衰交替,從來不脫武裝起事;貴族祭司壟斷知識,士兵軍人專職護國,如同中華帝國體制之中嘅皇親國戚以及元帥將軍,服務對象係皇室而非社會;知識分子抄寫記數,農民工匠負責生產,如同中華帝國社會內自命不凡嘅士大夫,以及千千萬萬目不識丁嘅貧農,只可以跟從巨輪滾動,永不超生。呢種社會模式,喺人類文明歷史上持續千年,喺唔同地區都有所發展,進程同樣都係由部落步向小國,然後由小國步向帝國,因為只有不停擴張規模,帝國嘅生命力至得以維持。過去,地球尚有大量未開發地方,帝國擴張未有邊界,但大航海時代之後,地球全面開發,文明之間衝突無日無之,要徹底解決國家之間嘅矛盾,已經唔再可以只憑武力,所以自由協商,部落共治,又再回歸人類眼前。

儒家思想,本身就係一種支撐帝國模式嘅落伍思想,喺全人類都已經認識到自由可貴嘅廿一世紀, 理應封存,鎖入博物館櫥窗。可惜嘅係,香港人一直都察覺唔到儒家思想嘅荼毒,一再自誤,以中國人自居,自困於舊世界地圖之上,進退維谷。儒家思想嘅核心價值係反對自由,西方文明嘅核心價值係自由最高,香港號稱中西合壁,以便利華洋共處而自豪,本身就係近乎精神分裂。一部電話,只可以裝蘋果嘅iOS,或者GoogleAndroid,貪多務得,兩邊落注,只係為中國拖延時間,消耗人類文明能源。而事實上,由一八四二年起,香港就已經唔係舊世界嘅一員,而係用緊自由陣營系統運作嘅準自由城邦。香港受英國殖民統治,由一開始以自由港自我定位,再發展出後來嘅司法獨立,都係履行緊西方文明嘅秩序,即使機件仍然不褪中華氣味,系統已經由頭重置,無法同中國兼容。正因為系統唔同,對自由嘅理解唔同,由香港落入中共手上開始,其實就已經係為日後嘅系統衝突埋下伏線——只要香港人鼓起勇氣,回復原廠設定,爭取獨立,就可以加入自由陣營,而中國亦會因為香港嘅分離,而必須正視自身系統嘅致命缺陷,繼而抉擇放棄中華帝國春秋大夢,抑或一意孤行對抗世界。香港獨立,係刺激中共,更係提醒台灣及早排毒,全速向正途進發。

所以,「今日香港,明日台灣」嘅真正意義,在於共同經營太平洋島鏈,封鎖中國,制止中華帝國破壞亞洲均勢嘅惡意。只要香港堅持獨立,寸步不讓,美國就會鼓動日本台灣南下支援,而中共滅亡,台灣以至新疆西藏,都可以擺脫魔爪,重新上路。如果香港留戀中國城市嘅身分,拒絕自立,而中國野心不息,出兵台灣,屆時台灣就要出兵還擊,死傷在所難免。而由於世界無法承受全面開戰,美國未到最後關頭都無意出動,中華民國名義就會派上用場——兩個中國對戰,日本毋須入局,美國自可隔岸觀火,直至台灣失守。明乎此,香港要掙扎求存,首先就要自我解殖,拒絕中華帝國嘅不義遨請,然後就可以協助自由陣營解放亞洲,繼而推動人類文明走向更自由嘅下一階段。以武力解決問題嘅手段,經過兩次世界之戰,已經證明此路不通,戰爭再度爆發,所影響嘅係全人類嘅福祉。

香港人必須記住嘅係,香港獨立,要付出嘅成本其實非常之小,因為自由陣營所植入嘅系統,早已根深蒂固。雖然香港已經倒退為反殖社會,但只要獨立,公民社會就會即刻復活;雖然香港警察已經淪為當權者走狗,但只要獨立,治安就會井然有序;雖然香港法治已經搖搖欲墜,但只要獨立,司法機關就會馬上可用。其他國家獨立之後,重建之路相當漫長,但香港得天獨厚,獨立之路,只要把握時機,果斷起步,就已經贏咗一半。

檢討香港民族性

六月十二日,香港警察屠殺上街民眾,美國總統Donald Trump以香港中國「will work it out」回應,狀甚無情。如果大家理解美國同香港嘅關係,就會知道美國總統如此答案,其實相當合理,事關香港而家爭取緊自由世界嘅入場券,獻頭投誠只係基本會費,美國身為現代文明守護者,必須擺出「你地自己拆掂佢」嘅姿態,至彰顯到領袖身分。過早給予香港希望,就會令香港人放軟手腳,再次心懷僥倖,一心等待民主從天而降,如此一來,領袖反而缺乏領袖應有權威。

美國嘅權威,有其不容質疑嘅原因,表面上係軍事力量足夠強大,實際上係秩序輸出足夠穩定。身為仲裁者,美國有權操縱形勢,想犧牲邊個就犧牲邊個,想拯救邊個就拯救邊個,因為可以出其不意,至突顯佢嘅威嚴所在。美國必須擺出冷漠態度,迫使所有國家都因為惶惶不安而極力奮鬥,同時具備無限威能,隨時令任何國家死心塌地跟從,呢種表現係自然生成,多於刻意為之。今次香港獨立戰爭,美國嘅定位仍然一樣:一方面令香港人認為美國無心鞏衛香港主權,另一方面又令中共明白,人權係美國終極底線。呢一刻,參透美國角色,認清世界秩序,知道美國政策不但從未自相矛盾,更唔會因共和民主政黨輪替替而生變,將對香港抗爭最為有利。

要融入世界秩序,必先認清主從架構,進而精進自身。自始至終,香港都誤以為中國值得依靠,於是飯來張口,等待民主中國出現,落注錯得離譜。香港人所唔理解嘅係,亞洲大國之間嘅勢力均衡,之所以七十年都從未打破,係因為大家都有共識,知道均勢萬一破裂,就會引發動亂,然後美國就要出手,收拾殘局。當年韓戰越戰之所以要鎖定戰場,就係要防止戰火擴散,而美蘇兩方之所以有意克制,就係要避免第三次世界大戰開打。香港人唔明白自己要跟從嘅領袖係任重道遠嘅美國,而非目光短淺嘅中國,就只有死路一條。

中國視野淺窄,係源於自身局限,由堅決維持大統一當日起,已經註定要面對失敗。中國自改革開放以降,一直以經濟利益換取管治合法性,目標清晰,欺騙手段高超,導致香港人盲目崇拜,同樣以為賺錢至上,一口咬定港獨一定冇可能,但事實上,中國從來都只識貿易,唔識政治,係現代世界嘅門外漢。中國不停輸出原材料,進佔低技術產業,第二大經濟體之地位表面風光,但呢個地位,只係先進國家順應時勢而為,並非中國真有任何獨特之處——失去美國德國日本等科技強國核心技術,失去世界貿易組織之中嘅發展中國家有利待遇,中國就會馬上打回原形,經濟蕭條,國不成國。偏偏,香港人缺乏主見,受中國灌輸嘅「大局為重」觀念影響,只睇到表面財富往來,睇唔到外交關係先係決定貿易來往嘅核心結構,昧於事實,就係九七至今,香港不進則退嘅原因。

此之所以,當香港越係誤信自身利益同中國緊密相連,就越會忽略香港同美國嘅共通之處,漸行漸遠。只有及早擺脫香港屬於中國一部分嘅執念,發掘自身真正優點,香港至有翻身可能。香港嘅民族性係態度開放,具有耐性,熱愛和平,但受壓受創,就會變得形象易塑,主見模糊,呢點香港人必須理解。主權移交前,英國著力洗刷國共兩黨對香港嘅政治煽動,任香港自由發揮,於是香港進退有道,游走大國之間如魚得水;其後,香港成為中國一部分,功利一面大受激發,不但迅速接受中國安排嘅定位,更因為避免衝突而處處忍讓——具體表現,就係由亞洲金融中心,自我矮化為中國窗口城市。中共「長期打算,充分利用」嘅戰略方針,所反映嘅就係中國從來唔識欣賞香港嘅真正價值,只係睇到香港會以特區身分幫佢賺錢,任勞任怨。而香港為咗免傷和氣,於是一再退讓,直至失去自我,先至意識到自己唔夠堅定,唔夠獨立,亦係民族歷史使然,發展合理。由冷靜沉著,退步至消極退縮,再墮落到自暴自棄,香港民族嘅健康水平之所以屢創新低,就係因為習慣遷就,意志薄弱。

中國將香港置入大灣區之後,香港再無利用價值。然而,因為善於交際多於化解衝突,香港人總係到最後關頭忍無可忍至會表明立場,面對自己,所以一直都隱而不發,等待形勢轉好,等待強者打救。終於,雨革過後,香港人至發現和平佔領無效,突然送中,香港人至終於知道自己退無可退,於是必須回復獨身,重新上路。香港一百七十年歷史所累積而成嘅民族特性,因跟從中共主旋律而受壓,一步一驚心,步伐日益混亂,逃生無門,只有跟上美國,至會再有重回正軌嘅機會。

美國易怒暴躁,有權決定幾時出手,以及出唔出手,因此唔會無故插手,向溫溫吞吞嘅香港給予意見。香港嘅被動,令美國根本察覺唔到香港表面上嘅平靜,原來充滿暗湧。香港經商立國,從無愛國之念,十九世紀,不為清廷所控,開埠通商,則以自由招徠四方,從來習慣左右逢迎,顧及全局。然而,正因為個性鮮明,中共就輕易睇穿香港弱點,以利誘之,最終就一舉成功,從英國手中奪取香港。因此,相比起抗爭,香港人嘅當務之急,其實係認清自我,脫離中國統治,心態一改,美國就自然會挺身而出,將香港劃入自己勢力範圍,代理香港事務。

不過,同美國合作,必有陣痛,要關係突飛猛進,必須具備意志,領受挑戰。要向美國靠攏,必須證明自己有意依附,呢個過程稍為痛苦,但我地回顧歷史,就會知道日本韓國同台灣都同樣經歷過,掙扎過。昭和帝國發動戰爭,最終戰敗,於是接受美國管治,然後雙方關係變得緊密;韓國對抗共產北韓,多任總統明顯親美,從屬於美國,然後成為亞洲強國;中華民國敗走台灣,親美反蘇,要對抗對岸中國,必須順應秩序,以美國為馬首。如今美國中國敵對,香港為求經濟利益而忽略道義,美國冷待,係源於香港自取其辱,自絕於世,香港人完全冇資格諉過於人。美國中國兩國鬥爭不息,源於中國拒絕美國主導嘅世界秩序,而香港可以做嘅,就係了解美國嘅直接作風,以勇氣同誠意敲開求助之門。

具體而言,香港必須檢討民族性,自我反省:

一、戒除順從,檢討過分包容他人嘅傾向,記住只有表現出自我自信,保持獨立,至會重新擁有國際地位;
二、承認焦慮,學習面對共產政權嘅壓力,及早領悟中國殖民香港乃係事實,接受反殖過程難免混亂亦係事實;
三、發揮所長,知道自身最大資產係善於吸納,學識觀察世界秩序,選擇正確路向,連結自由陣營同伴。

美國總統甘迺迪就職演說中有言,「Ask not what your country can do for you, ask what you can do for your country.」自由陣營領袖嘅氣魄,理應如此。質疑美國之前,請思考香港為爭取民主付出過幾多,而思考過後,請繼續思考,為香港民族未來繼續奮鬥。成功路上必有失敗,但只有保持熱情,方向準確,香港必將勝利,正義必將伸張。

中共故意強推送中 自由世界門票現正發售

中共真正目標,係消耗香港民氣,修訂條例只係表面手段。正因為呢次抗爭嘅決勝關鍵,在於同對家周旋到底,我方無謂犧牲,理應可免則免,因為決戰之日,全港暴動,人人都要喺各自崗位之上,盡力一煲。只有保護自己,保護同路人,等待最佳時機出擊,香港人嘅抗共大業至會夢想成真。

首先,中共需要爭取時間,對付以美國為首嘅西方國家施壓,香港目前既為九反之地,自然要加以抑制。雨革至今,香港人已經痛定思痛,認清事實,魚蛋革命就係感受水溫嘅牛刀小試,志在畀同路人確認心意。中共意識到大規模示威隨時爆發,所以就瘋狂炒作送中條例,火速煮滾溫水,催谷民眾盡早上街,某程度上,二零一九年要有遊行,其實完全喺對家掌握之中。只要香港人再嘗滑鐵盧,二零二零年就必然無法重整旗鼓,咁中共要顧嘅後患,就又少一個。

呢三兩年,中共喺習近平主導之下,加快步伐消滅各地勢力,設立新疆集中營殘害平民,正係例子。佢地認為,只要收拾能力範圍可控嘅烏合之眾,就可以集中火力滲透台灣,阻礙蔡英文連任。假如習近平「正在下一盤很大的棋」所言非虛,以收復台灣去證明自己,就係佢嘅中期目標。香港一死,中共就會暫時置香港於不理,只要三年內唔再有佔領,香港有空間自生自滅都無關大局,呢點就係中共最想達到嘅目的。因此,通過送中條例,緩急不拘,佢要嘅係香港人示弱示忠,放軟手腳,處理完台灣之後再返轉頭拆彈。一但呢個如意算盤打響,台灣落入親共勢力之手,亞洲形勢就會生變,日韓兩國嘅協防責任就會瞬間大增。

中國意圖稱霸亞洲呢個願景,中共講咗半個世紀,基礎之深,視野之闊,非香港人所能企及。然而,正因為中國倒行逆施,挑戰自由世界,香港人只要企啱陣營,就有逃生可能。自西方與東方碰撞至今,自由平等思想一直東傳,全人類要共同實現同鞏固嘅普世價值,已經日益普及,蘇聯倒台,象徵嘅就係極權必敗,自由必勝。中國以黨國體制治國,拒絕普世價值,拒絕選民監督,步上蘇聯後塵,係遲早嘅事,佢垂死掙扎,不惜玉石俱焚,其實就係舊秩序嘅終極反撲。如果爭取中國民主係香港人應該做嘅事,我地就更要堅決反共——中共一崩,中國各省就會回復自由,屆時亞洲民主遍地開花,中國人至會有轉型出路。

所以,中國同香港嘅關係,的確係螳螂捕蟬,但我地唔可以唔知嘅係,黃雀始終在後。真正以螳臂擋車者,唔係香港,而係中共,因為中共以一己之力單挑自由世界,勝算係接近零。香港目前嘅角色,係作為誘餌,消耗螳螂體力,等美國安放喺亞洲嘅同伴爭取時間集結力量。具體而言,香港情況越差,台灣就會越理解二零二零年總統大選嘅價值,而台灣嘅國運越危,日韓歐美亦會越意識到中共嘅可怕。中共想分化大家,逐個擊破,最終突破美國主導嘅封鎖線,而香港人緊守嘅,就係要道關隘,絕不可失。簡而言之,爭香港主權,係為香港,更係為全世界,上街佔領,絕對係世界公民應有之義,習近平想向黨內勢力證明自己治國有方,香港人必定要將佢迫上梁山,等佢一死以謝天下。

主權國家各自獨立,然後合作,建立依存關係,至會有利全體生存。太陽努力發熱,花草努力生長,牛羊努力繁衍,獅子老虎至會有肉可食,然後喺死後再回饋自然。任何物種,都唔可以假手於人,因為懶惰而造成依賴,只會拖累其他物種,結果同歸於盡。香港一日未獨立,就一日都係世界秩序嘅寄生蟲,只識享受,不知羞恥,所謂民主唔會從天而降,就係如此意思。

世界第三次大戰會唔會爆發,就要睇香港人為咗保衛第二次大戰確立嘅世界秩序願意付出幾多。香港擋得住,中國就會原形畢露,美國就有出師理由,咁就可以用最少力量擊敗中共,解放中國。相比起半個世紀前爭取獨立嘅國家,香港嘅路,其實已經舒服到不得了,因為我地唔係要幫手建立秩序,只係要跟住現有規則收拾殘局,清剿餘孽。真正捉緊大棋嘅,係美國,而習近平只係自以為是嘅癡漢,喺自己嘅小天地坐井觀天,自得其樂。二零一九年,香港人嘅方向好簡單:同中共對抗,就係向自由世界投誠,令中共失控,就係香港人躋身自由世界樂園嘅入場門票,想玩,就一定要備好資金,無懼透支,為幫助蔡英文連任而作戰。

美國兩黨已達成共識,修例之後,隨時取消《香港關係法》,而中共跪低,則表示畏懼美國,臨陣退縮。加上本身美中貿易戰一直拉鋸,香港呢次捱過六月,就等同向美國發送親美訊號,既顯示出香港人無意為中共服務,充當白手套。事已至此,中共騎虎難下,香港成為兩方陣營角力場,因此今次衝唔衝擊,林鄭落唔落台,已經唔係首要考慮,最重要係唔好損兵折將,唔好灰心喪志。只有保留力量,等到二零二零至同台灣同時發難都係為時未晚,短期和理非係冇問題,因為隨時暴動先係香港最強籌碼。做好目前,精進自身,就係幫助他人同改變世界嘅開始,只要有心贏,就一定唔會輸。人類總係臨危方知受命,然後逃避困境,但逃避,只會更加迷失。香港未來,前路未必清晰,但我知道方向,隨時可以起行。

反殖立國,革命維新

雨革期間,民眾開始反對大台領導,各方熱心議論抗爭策略,意見紛紜,如今大戰一觸即發,相近情勢又再出現。身邊友人心急如焚,有人問我應該點做嘅,有人叫我呼籲少年切勿盲動,亦有人問起大局何去何從,而我嘅應對比起當年,已經有咗相當長足嘅進步。相比起尋覓可以跟從嘅路,每一個人都開始思考現實,接受現實,至會成就轉機,為未來爭取有用籌碼。

香港人深信香港係公民社會,習慣假手於人,依賴組織,盲點在於,香港嘅宗主國已非英國,而係從根本上反對人權嘅中國。只有認識到殖民從未終結,全力解殖反殖,今次抗爭至會有希望。九七之前,香港有半民主嘅議會,有獨立司法機關,又有多元開放嘅社會風氣,港英政府製造嘅自由假象,蒙騙得到大眾之餘,更成為咗中共偷師對象。正如當年二戰過後,忙於將日軍軍備收為己用一樣,中共發現殖民政策愚民有效,就以所謂「港人治港,高度自治」繼續統治香港,以拖字訣應付香港人嘅民主訴求。

然而,選用訴求二字,香港人由一開始就已經徹底落入殖民者圈套,泥足深陷。公民社會存在嘅前提,係主權國家同民主制度之有無,若然英國並非主權國家,倫敦樞密院消失,光榮革命從未發生,英國社會本身亦唔可能成長為公民社會。只有當權者由人民授權,民眾至可以用溫和手段傳達意願,因為民選政府嘅實然存在,已經消融咗所有訴諸武力嘅原始心態— —戰爭之所以喺人類社會一再發生,就係因為人類感到生存空間受到威脅,利益分配不合情理,衝突避無可避,而以協商代替戰爭,就係人類考量過整體利弊之後決定利用嘅共存模式。過渡到現代世界,西方國家確立主權之後,為咗減少國人分歧,阻止國內動盪頻生,就將古已有之嘅民主制度推而廣之,公民社會由是誕生。值得留意嘅係,所謂民主,其實喺小型部落之間並非罕見,曾聚居於現代美國東北部嘅原住民部落就曾經建立五族同盟,又稱Iroquois,以議事會形式維持部落發展。議事會容許一切成年男女享有平等表決權,不論係撤換酋長同軍事首領,履行公義,為受害氏族成員接受贖金或開戰復仇,定係收養外人加入氏族,都以呢個權力機關中心,以確保人民意願得到尊重,而人民亦可以提出訴求,因此和平就成為常態,大規模衝突只發生喺外敵入侵嘅時候。

因為誤信一國兩制,昧於中國殖民香港之事實,香港人向中共伸手領取民主,屢試屢敗。香港人所唔理解嘅係,民主係有一定程度文化同質嘅社會之中嘅解決紛爭之道,若然中共容許香港擁有民主,就無異於親手培養滋生分離主義嘅地區,任由共享連結嘅政治共同體挑戰國家權威。香港人有民主,就會凝聚民族意識,而本土利益高於中國利益之時,香港就會係計時炸彈,隨時自內以外,摧毀中國。如果香港人明白到香港民主同中國利益從來無法共存,就會知道過去廿年嘅等待係何其天真。民主唔可能從天而降嘅原因,在於中共治下嘅中國,永遠唔會接受異見,而香港人千方百計示弱示忠,都唔會給予到中共信心放權,所以只有追趕已經遠去近半世紀嘅反殖潮流,香港至有可能重整旗鼓,建立民主,而以為公民社會可以信賴,本身就反映緊一種絕對錯誤嘅認知。

意識到無主權則無民主之後,唔難發現,香港正處於本國歷史進程路上,前所未見嘅渾沌,由零開始,係香港人唯一可行之路。如果大家以為保持和平理性非暴力,就可以撥亂反正,穩中求勝,呢一仗點打都係輸。現有嘅政治組織,全部都係依附殖民系統而生,泛民所輸出畀香港人嘅論述,正正就係一而再再而三咁,將香港由大路推向小路,再由小路推入死路。唔相信大台,唔相信現有組織,唔相信聽從指令,係打倒中共一黨專政嘅關鍵覺醒,覺醒之後,大家毋須再問,自己應該做乜,因為規則指引已經崩析,每一個人都獲得咗真正自由,淨返落黎嘅,就係問清楚自己,到底可以做到啲乜。

因此,一切都只有自下而上嘅發展,而只要每人都發揮一己所長,精進自身,香港就會有救。我唔會阻止義人自焚,亦唔會批評連遊行都唔去嘅平民愚昧,因為所謂自由,就係人人都有權以自己嘅方式去生活,以及貢獻他人,叫後生仔唔好送死,本質上就已經係相當驕傲。他人生命嘅意義,係由佢自己定義,如果我地假設死亡等於白費,就係用緊自己嘅價值去排斥他人嘅價值,如此一來,就同自由世界漸行漸遠,淪為文明世界嘅化外之民。革命從來唔係請客食飯,受傷流血在所難免,只要犧牲者認為自己嘅死亡比生存更有價值,喺我地盡力為佢地分析結果之後,我地就應該靜靜退後,尊重佢地嘅選擇,等佢地可以為佢地所愛嘅香港,拋頭顱灑熱血。只要一石擊起千重浪,趁民氣高漲,全民上街佔領,殺防暴一個措手不及,犧牲者嘅生命意義就得以彰顯,捨身成仁,造福後世,生命價值最崇高嘅體現,莫過於此。

而無意衝擊嘅人,可以做嘅亦有好多。只要你有心有力,任何難關,都唔係我地聽任天命嘅藉口。孔武有力,可以殺上前線,體格一般,可以處理物資,無法到場,可以罷工罷課,分身乏術,可以轉發消息,任何行為,只要發願為善,都有意義。再退一步,識得外語,可以幫手翻譯,弱於辯論,大可動人以誠,只要你知道自由嘅價值,知道香港必須自在外於中國,你就可以為香港略盡綿力,心誠則靈。爭一己之自由者,方可爭一國之自由,明一己之獨立,方可爭一國之獨立。大敵當前,我地必須成為獨立個體,拒絕聽命,而獨立之後,我地互相信任,互相依存,就會激發出最大能量,撼動現實。

人嘅意志,可以改寫現實,意志不堅,就會變得犬儒,變得懦弱,變成六四屠城之後嘅中國人。今次修法若然輕易通過,未來一年,中共將會集中精力對付台灣,而想保護台灣,拱衛民主,香港必須爭取獨立,表示決心。正因為香港人嘅戰意會影響中共嘅部署,我地更要相信,香港並非毫無地位,而要再次成為國際大都會,再現昔日光輝,就必須停止示弱,宣告獨立。草苗絕處可以生長,因為繁衍乃係生物本能,而只有保有求生意志,我地至會真正咁順應大自然法則。野火一燒,生機將至,但願自由種子所及之處,足令枯木重生,春天得志。

香港有實然主權,有司法獨立,有自己嘅語言文化,而且金融中心地位尚未暴跌,又緊扼中國走資通道,相比起好多爭取民主嘅地方,我地起步點已經可以稱為相當之高,根本唔應該有灰心嘅理由。假如當日中共冇橫加干預,喺聯合國剔除香港作為自治領嘅權利,我地早就喺英國嘅幫助之下,跟隨當年局勢,順利由殖民地蛻變成自治領,然後成家立國,所以而家只係係做返當年就要做嘅事——逝者可追,只要我地團結一致,每晚放工之後走上街頭,留守到表決之日,形勢就會明朗。獨立之路從來艱難,但七百萬人同心協力,就有功成嘅可能,而功成之日,大家就會知道,所有受過嘅苦難,流過嘅血汗,都係值得。

香港獨立,勢在必行,香港民族,克日維新,革命就在今日。

感受秩序

因為早有外遊計劃,六月九號,我人在長崎,遠離香港,未有出席遊行。平時說服世人,最常講嘅係每個人頭都有價值,但如今自己則置身事外,驟眼睇落,可謂諷刺。然而,雖則大多數人都需要親歷其境以利日後回憶,我亦唔例外,但同時我亦知道,按照計劃帶領家人感受世界秩序同樣意義深遠,因此我問心無愧,心安理得。

長崎係美國投放第二個原子彈嘅日本城市,若然香港遊行都可以稱為終局之戰,日本嘅徹底覺醒,就係長崎之戰。認知到自己只可以稱霸一方,無力撼動以美國為首嘅世界秩序,日本立定志向,全速改變航道,戰後急速復甦,全賴美國允許扶持。日本傾盡全力挑戰,戰後又以知恥近乎勇嘅姿態安守本份,充分顯示到參與秩序嘅誠意,如此益友,美國自然樂於吸納。戰爭本質係秩序輸出,資源爭奪係表面文章,遊覽原爆資料館同和平公園,正好借日本嘅取態,解釋今日中國點解必敗,以及日本已經立於不敗之地嘅原因。而他國歷史之所以令我深有體會,係因為日本平民嘅血肉橫飛,其實正正就係我地後人認清局勢嘅前車之鑑——如果香港人唔把握機會,追認權力來源,合力拒共,將來粉身碎骨嘅就係我地。

自黑船來航,幕府時代閉幕,日人意識到天外有天,於是推動明治維新。以美國為首嘅西方世界,開闊日人視野,福澤諭吉主張脫亞入歐,力圖富國強兵,就係志在追趕西方。其後,大東亞共榮圈構想成型,日本認知開始出錯,軍國主義冒起,所意味嘅就係日本以為自己可以輕易撬動世界秩序,而太平洋戰爭揭幕,所象徵嘅就係日本走火入魔,昧於形勢。日本以為英美之所以支配世界,全靠荷槍實彈同財金操縱,呢點認知同現時中共思維極其相似。

中共思維出錯,表徵為習近平嘅誤判,但誤判既係個人失誤,亦係結構使然。二戰過後,中共沿用蘇維埃模式經營國家,因美國主攻蘇聯而得以休養生息,於是誤以為黨國體制無誤;蘇聯瓦解,中共推行改革開放,鎮壓民眾示威,但因美國懶理世事而平穩過渡,結果一再自誤,助長奪權野心。終於,中共以韜光養晦姿態,一方面累積經濟力量,一方面抄襲研發武器,習近平夢想中嘅反攻之日逐漸臨近——加入世貿、舉辦奧運、一帶一路,都係重蹈昭和覆轍,軌跡一樣。香港處身棋局一隅,近距離觀察,理應份外理解中國近二十年嘅崛起大計難以成真,因為中國連東亞區內強國日本都重未超越得到。偏偏,無數香港人精神分裂,盲目親中,以為靠攏中國有利自身,可謂愚昧之至。

中國如同當年日本,唔知自己只夠能力喺外圍蝦蝦霸霸,癡心妄想自己可以擊敗美國,取而代之,下場註定失敗。我走入原爆資料館,直視怵目驚心嘅頹垣敗瓦,不期然就預視到香港執迷不悟嘅結果。館內,展覽設計者無意迴避自身責任,未有怪罪美國,重現當日十一點零二分核爆一刻恐怖現場,全為警告自身,同時警告世界,因為挑戰秩序,自取其辱,係合乎邏輯嘅結局。一般人會話,美國霸權令日人又愛又恨,但只要足夠清醒,日本嘅親近美國甚至崇敬美國嘅傾向,其實顯而易見。日本之所以放棄同美國對立,源於日本已經接受咗由美國所主導同推動嘅秩序,只求一人之下,不求僭越職權。日本人嘅有條不紊,各安其分,在此又見一斑,《菊與刀》之所以描述日人兵敗即徹底投降嘅自相矛盾,大概正係美國視角嘅無意識流露。

日本戰後嘅轉變,非但冇集矛盾於一身,更加係有極之清晰可循嘅脈絡可以捉摸。日本由此至終,目標明確,就係獨立自強,以一己之力輸出秩序,直到輸畀美國,先至發現原來毋須單打獨鬥,靠自己創建秩序,而係可以同美國互相依存,管治世界。二戰期間,美國政府之所以吩咐人類學者研究日本,正係源於美國終於遇到難題,發覺世界上有啲民族自成一系,而又不輸美國。美國文化多元,性格外向,遇上日本文化單一,性格內斂,本來並非一拍即合,但正因為日本痛定思痛,融入世界,火速崛起成為世界強國,而美國全力支持,分配東亞以及太平洋島鏈畀佢打理,亦係出於信任。相反,中共從未直接受創,因而態度囂張,自取滅亡在所難免。中國鼓動國人仇美仇日,以愛國主義操縱人心,強調南京大屠殺舊事,指責美國制裁中國玩單邊主義,都係因為誤以為對抗有用。

曾經,中共打算對香港「長期打算,充分利用」,但習近平執政,急於求成,陣腳一亂,香港就變成犧牲品。今日我留喺酒店,隔岸睇live,睇見港島近乎癱瘓,心中不無感動。人在千里之外,內心始終記掛,想話唔關心政治都講唔過去。今次遊行,大眾以要求林鄭月娥下台同要求撤回送中條例為口號,未必了解自己暗中傳達嘅訊息,但行為本身,已經展現出最強烈嘅反共情緒。反對林鄭,即係否定中共走狗,撤回修例,即係拒絕中國執法,可知香港同中國最根本嘅分別,就係在於秩序嘅取捨。秩序即現代文明,選擇現代文明即等同講人權講自由,進而建立民主以及鼓勵多元,一言以蔽之,香港要爭取普選,必先重視人權,而要奠定人權,就要脫離從根本上反對人權嘅政權,自立門戶。簡而言之,時機成熟,就係呢一刻。

今日進入原爆資料館前,喺入口見到個極富象徵意義嘅設計。驗票機兩側,竟然有接近兩三米嘅團體入口中門大開,彷佛任得訪客自由進出——嗰一剎,我忽然心生聯想,深刻理解何謂秩序嘅終極呈現。日本嘅整潔有序,並非源於他律,而係自律,因此即使不設防範,亦唔會引起混亂。如果呢種設計出現喺缺乏秩序嘅國家,例如中國,館方一定坐食山空,不出一年,旋即結業,而要避免損失,館方就必須嚴厲執法,正如中國選擇拒絕秩序,自然就要以法治國,極力自保。願唔願意接受秩序係人類嘅選擇,而香港處於文明與野蠻之間,用邊種方法去表態,其實係反映我地對自己處境嘅認知,以及投誠嘅決心。今次百萬人上街都仍然和平克制,代表大眾選擇相信秩序領袖會出手相救,但假如西方國家認為香港人決心不足,我地就必須行動升級,破釜沉舟,力求趁中共不自量力之際,拉遠自身同惡嘅距離。關鍵時刻示威定示弱,就係睇大家喺知道善嘅方向之後,夠唔夠力向和平推進。

真正嘅和平,必須建立喺武力之上,因為蠢蠢欲動嘅人,充斥前現代世界。走入和平公園,我見到有關無核化嘅期許,但我更知道箇中真正嘅訊息,其實係希望世上野蠻國家可以向日本學習,自我反省,放低武器,乖乖接受美國訓政。我地無法排除中國有力重建秩序嘅可能,更勝美國,但文明倒退千年再由頭開始嘅代價,相信全人類都難以承受。合力抵制秩序破壞,唔係為國捐軀,只係為咗自己每日可以有電視睇,有飽飯食,然後每年都可以去日本旅行。日本嘅秩序,令我更希望香港都可以及早進入其中,但願條例通過之後,美國出師有名,二十年內消滅中共,為後冷戰時代正式劃上句號,而香港人處於刀口,可以出一分力,他日講起,亦有資格同子孫吹噓,我嗰一代人,勇於不落人後。

維園晚會for the newbies

悼念六四係我參與政治嘅起點,支聯會燭光晚會去過兩年,覺得肉麻,轉身一別,然後就返唔到轉頭。十七八歲嘅我,係徹頭徹尾嘅大中華膠,但始終求真嘅堅持,終於將我引向另一航道,而我至今仍然未有改觀——中國有民主,香港至會有民主或者有運行,一年比一年站唔住腳。二零一九年,我深感正確嘅觀念可以喺人生早期形成係莫大運氣,亦慶幸自己從來唔係嗰啲大言不慚話讀書唔重要嘅靈長生物,因為若干年後,等到某個歷史轉折過後,當世人都抱怨不斷嘅時候,我就唔會需要為點解會咁後知後覺而追悔,因為上帝早已預備,而上帝不過係人類自身。

我傾向以行為判斷他人,相信仔細去聽其言觀其行,可以睇穿一切障眼之術。組織宗旨口號反映思想綱領,如果冇內在,就唔會支撐得起相應嘅選字造句。支聯會主張平反六四,附帶嘅係結束一黨專政,以及建立民主中國。我記得當年第一次去維園,我對於呢一切都仍然毫無感覺,只係人云亦云咁講話要記住真相,要為歷史做見證。其時社交網絡尚未喺香港興起,做呢啲都冇而家咁做畀人睇,主要係為咗自我感覺良好,等自己同知識分子嘅標籤更近一步。認中方能關社,關社自然認中,上承七十年代嘅本地學潮,一直如是。

之後,必須感激支聯會成員一再暴露真貌,我逐漸就發覺,其實成個儀式,同我嘅香港人認同有矛盾。香港人認同係與生俱來,因為我土生土長,出身基層,廣東話流利,聽嘅係陳奕迅嘅哲理情歌,睇嘅係無綫嘅顛峰之作,接受嘅係香港嘅社會常態。雖然香港文化嘅根基不穩,但我意識到佢係如同物質嘅實然存在,差嘅只係借作時間加以固化——其實只要三代人,唔需要多,三代人同我經歷一樣嘅香港生活,香港就有力自成一格。於是,我開始唔理解支聯會成員致力鼓勵新移民來港家庭團聚嘅立心,攻擊天安門母親丁子霖嘅舉動,支聯會嘅唯我獨尊姿態,亦日益鮮明。加上台上哭喪儀式同台下成員處事應對判若雲泥,我開始心生戒心,然後一發不可收。

接受組織,源於信任。而當信任崩壞,凝聚力就會一去不返。支聯會靈魂人物司徒華同共產黨關係密切係事實,佢人在學友社之時,所做嘅任務就係統戰香港。據梁慕嫺所言,司徒華因為太具鋒芒而受到妒忌,地下黨擔心佢自成一系,尾大不掉,就密謀計算佢,已經略為心灰,而後來佢喺文憑教師薪酬事件同中共決裂,更加證明自己已經唔再親共,但關鍵係,反對組織,唔等於唔再愛國,因此司徒華仍然唔係心繫香港嘅堅實同道。不論後來成為香港名人嘅司徒華有冇再次受到中共統戰,回歸黨嘅懷抱,愛國多於愛港,可以話係毋庸置疑。由此延伸,支聯會死攬住中國唔放,呢個取態令身為香港人嘅我份外覺得周身唔聚財,而批判之意亦油然而生。

無可否認,燭光晚會係香港最有gimmick嘅活動,newbie要開始接觸政治,首選非佢莫屬。有重大歷史事件為基底,有各大團體雲集籌款,有宣示口號有歌曲唱誦,有片有騷有獎抽有女溝,熱鬧非凡,newbie去完一定熱血沸騰,「深感自己做咗啲嘢」。社會人對於儀式嘅追求,渴望從儀式中得到嘅情感慰藉,以至借助儀式去塑造自我形象嘅意慾,燭光晚會都可以滿足。正因如此,好多唔太思考香港利益嘅人,或者滿足於表現我關心政治嘅人,至今都唔察覺燭光晚會有問題,更加唔會去諗悼念六四可以有其他模式。有現成儀式就舉家赴會,有現世論述就據為己有,無視香港正受中國殖民,忽略中國潰而不崩未必有利香港,正正就係而家都去緊維園嘅人嘅心態。

尋日有位素來同佢唔算有太多思想交流嘅友人,六四前夕心血來潮,於是叫我幫佢校對佢嘅Facebook status,然後我睇完,就講咗句「至少都算關心政治」,以聊勝於無嘅態度鼓勵佢。然而,不出意料,佢忽然就話我口氣好大,憑乜覺得自己一套最有智慧最有道理,然後就情緒大作。因為以前已經有同佢討論港獨嘅經驗,我知道佢唔係胸襟廣闊,可以真心聽取唔同政治見解嘅人,我都唔打算多言,關心六四但又唔去理解港獨思潮出現呢種表現,實在令我缺乏動力用更加溫和嘅口吻去加以引導。我無法接受嘅係,以關心香港政治嘅人自居嘅人,至今都仍然對本土意識抬頭避而不談,至今都仍然昧於支聯會嘅hidden agenda(not so hidden to me though),然後重口口聲聲話我自以為是,高人一等。我唔認為世人需要認同佔領行動,認同梁天琦黃台仰行徑,認同香港獨立勢在必行,但覺得自己好文明,但唔接受香港人有權按住民自決原則去獨立建國,呢種態度只有偽善可以形容。當人無法意識或承認自己嘅偽善,就自然會成為注重顏面而缺乏自覺嘅人,而咁樣嘅人,係連有效溝通都唔會開啟到,讀幾多書都唔會有用,因為讀書所學同佢處世之道根本從來冇重疊過,更加唔好話有所整合。

而其實,低度投入政治,本身係冇是非對錯。鄙視他人唔理政治嘅心態,我已經戒咗好耐,因為人人起步同際遇都唔同,覺醒係冇得強求。我自身亦唔係好關心政治嘅人,遊行示威甚少參與,因此我亦唔會介意有人同我講我唔關心政治,因為我清楚知道政治係參與得幾多都唔會夠,而就算身居要位,已經係政界要人,其實都唔等於佢係高度參與政治。參與政治係一種狀態,而連自我都未發掘出黎嘅人,自己嘅生活都未過得好嘅人,參與政治只係越級挑戰,因為佢地根本唔會從政治之中有所領悟,用返喺自己嘅人生,亦唔會識得以自身所得嘅領悟,裝備政治立場,從而以最適當嘅行為去表達自己嘅政治見解。關心政治之前,首先要關心自己嘅內在,盡力面對自己嘅恐懼,反思自己嘅缺失,否則場刊同紀念品拎得再多,最終雙手都只會空空如也。

熱戰不再,新冷戰如箭在弦,我最期待嘅畫面終於出現,和平時代生於安逸嘅典型少年,非我莫屬。閱讀上個世紀歷史,我成日都想回到過去,參與參與唔切嘅大事,例如六四,直到而家自己都開始有隱約感知風雨將至嘅預測觸覺之後,至逐漸又明白到戰爭有幾可畏,而安樂茶飯又有幾難能可貴。又或者更準確而言,係我到咗但求歲月靜好嘅心境,而又遇到因惺惺相惜而及時入席嘅真命。所謂真命唔等於會永遠一齊,或者為佢而學識貪生怕死,但佢令我更有勇氣去面對虛無,面對死亡,面對未來嘅世途險阻,到適當嘅時機再為我所愛嘅香港獻身,因為佢都一直努力緊去精進佢嘅人生,而成個香港都一直努力咁掙扎求存。只有精進自身,至可以講為他人付出,為香港貢獻,修身齊家先於一切之義,大概如此。

歡賀香港人終於認清世界秩序

trump

上個禮拜同女朋友嘅朋友S食飯,對方素來熱心以身體力行方式參與政治,於是就好奇我對集會遊行嘅取態。女朋友曾經同S講過我嘅為人同政治見解,但相信由我親自解釋原因更為合適,於是我就侃侃而談,講返自己嘅經歷同體會。

自雨革之後,因為灰心,因為倦怠,集會遊行我已經甚少參與。集會遊行係公民社會常態,效用要得以發揮,前提係確立民主制度,或至少有開放社會風氣。英治香港為香港人所提供嘅庇護,正正就令到大眾有種錯覺,誤以為用如此溫和嘅方式,就可以達成到想要嘅社會改革目標。香港有政黨,有壓力團體,有三權分立,呢啲就係構成錯覺嘅表徵。然而,真正支撐住香港繁榮穩定嘅,係呢啲表徵底下所隱藏嘅英國主權,如果英國唔係民主國家,一切表徵都係一文不值。長久以黎,香港人都以為有司法獨立就可以保障人權自由,以為有個立法會就可以維持下情上達,甚至以為有所謂普選就可以兌換全面民主,呢啲都係極其天真嘅想法,因為主權從來在於中共手中。

事實上,所謂司法獨立,必須要以具備健全民主制度為前提,而喺香港呢種連人權為何物都未整理同確立嘅地方,錯漏百出係必然趨向。香港嘅司法獨立好輕易就會淪為惡法,行政吸納好輕易就會扭曲民意,係因為香港政府並非由香港人所授權。大多數西方國家之所以唔會忽然大開歷史倒車,陷入類似香港嘅精神錯亂,就係在於佢地所經歷嘅進程係較為循序漸進,有主權然後有民主,逐步實現。以美國為例,其實所謂民主文化亦係首先由有地位嘅男性開始掌權,然後至擴展到女性以及黑人,而動物權益性別平等呢啲更加進步嘅概念,都係「人皆生而平等」嘅延伸。

目前嘅香港,係處於反殖解殖時期,主權未定,其餘一切都難免顯得操之過急。我從來唔反對關心政治嘅人繼續行禮如儀,繼續投票選舉議員代表,因為我理解每一個人頭都係一種表態,而一四年之前嘅我,亦同樣去過助選,去過監票,每日捕喺電腦前面跟進新聞。即使於我而言,仍然相信彬彬有禮嘅形式足以撼動政權係不切實際,我都認為反抗係聊勝於無,只要大家抽得出時間去做。同S相比,我顯得政治冷感,但我唔會自慚形穢,因為我對於身邊人嘅影響,如無意外,早已經超越出席遊行同轉發新聞,而我認為,每個人都喺自己嘅崗位按自己嘅特質去發揮力量,至係有益於世。決定出席與否,都係個人自由,毋須強迫,亦無從強迫。唯我獨尊,排斥異己,或者鬧人係低b黃絲,貶損他人嘅政治參與方式都係有弊無利。

談論香港政局,好多人都傾向自我縮細,棄械投降,認為香港無法戰勝中國,但以我對香港定位嘅思考而言,呢種觀察確有道理,但亦未盡完善。香港條件一般,以小國思維見機行事係呢種講法嘅合理之處,但如果以為東亞地區某個人口大國就可以主宰生殺大權,就係目光短淺。中共嘅壯大,係因為冷戰中後期美國忙於收拾蘇聯而致,美國選擇同中共建交,係策略性合作,而後來嘅養虎為患其實亦係美國嘅責任。美國經歷越戰失利,國內主流聲音已經傾向休養生息,直到終於擊敗蘇聯,回歸自我孤立之路係勢在必然。中共黨內嘅所謂韜光養晦之策奏效,鄧小平至胡錦濤執政期間,中國都係以唔驚動美國神經咁默默擴張為方針,因此美國亦誤以為扶掖後進勝於兩敗俱傷,選擇接受中國。豈料,習近平執政以降,中國路線漸漸生變,而香港首當其衝,正成為世界觀望中國取態嘅風向儀——先有國民教育意圖洗腦,後有雨革運動佔領鬧市,再有漠視選舉取消梁游議員資格,都係中國忽視一國兩制嘅鐵證。

終於,由雨革開始講到而家嘅所謂時機終於來臨,Trump上台之後,牽一髮而動全身,大國之間能量消長極其明顯。美國身為秩序建立及輸出者,下定決心重擊中國,源於中國動作多多,密鑼緊鼓,意圖挑戰美國,由以經濟影響政治嘅一帶一路,到動員中國人左右他國內政,以至偷竊高科技機密,無一唔係與美國爭利。於是,一度靠攏中國嘅中亞同東南亞國家開始終止合作,高唱大愛包容嘅澳洲社會亦積極抵抗紅色資本,就連習慣見機行事嘅台灣都知道機不可失,主動親美,美台關係火速升溫。因此,山雨欲來之勢只係結果,中國獨力挑戰全世界嘅根本原因,其實係中共拒絕放權,反對民主,唔願意接受西方普世價值,而香港所面對嘅急劇轉變,則可以歸因於習近平嘅急於求成。

S認為,會行出黎嘅人有力量,既然係力量就理應善用,呢點我相當認同。問題係,大多數人睇一單新聞就係一單新聞,睇一篇文章就係一篇文章,收集無數嘅小點,但無力將小點連成線,因此持續關注,但得唔出結論,或者得到結論,亦流於脆弱,一觸即碎。要講服或動員呢啲人,只可以揀最易說明嘅立場,最為切身嘅議題,當事態未夠嚴重,講幾多都係白費唇舌。好彩嘅話,佢地係愚蠢嘅人,忙於收集小點但疏於辯證,至少唔會盲目堅持立場,但更大多數嘅人都係愚昧嘅人,只顧表達己見,忙於將自己所知傾倒人前,唔理他人需要,亦甚少反省自己——於是所謂關心政治,往往就會演為潑婦對罵,人身攻擊,非黑即白,因為知識越係淺薄嘅人,越係缺乏自覺,越會熱衷於自暴其短,要同佢地尋求共識都唔係易事。

因此,《逃犯條例》關鍵落於「反送中」三字,確實係施力良機,相比起由親中團體支聯會主理嘅六四集會,呢次修訂象徵意義極其重大。修訂通過之後,北京當局可以隨時要求香港政府配合引渡政治犯,乘機逮捕異見人士,而當嫌疑人進入中國審訊程序,即使唔識法律嘅人都可以想見,一旦判刑,嫌疑人就要喺中國監獄服刑,黑幕之後,一切死無對證。眾所周知,中國嘅刑事案件都係由行政當局先行判斷政治成分,再指使所謂法院處理,毫無公義可言,如此一來,香港司法獨立呢塊遮醜布就會徹底揭開,而香港長期獨享嘅國際認可,亦會再度暴跌。換言之,《逃犯條例》已經捲入美國對中全面制裁一戰,香港將會正式降格為附屬中國嘅城市,無法再自外於中國,而香港商界嘅經貿優勢,平民嘅出入境自由,都會嚴重受損。

適逢美國高調痛擊中共及其羽翼,德國又向香港政治人物提供難民庇護,香港人以集會遊行集結民意,正可以同反中國家裡應外合,表現香港人反抗中國殖民統治嘅決心。反送中議題團結唔同政見嘅人,令聯署同宣傳文本充滿香港網絡世界,要數對上一次程度類近嘅群情洶湧,已經要去到港視發牌。今次遊行之所以唔再流於形式,而係具備真正意義,在於佢嘅核心係反對殖民,對抗暴政,拒絕與中國接軌,分離主義意識之明確,前所未見。當分離主義已經成為香港人主體共識,香港前途問題必然發酵,而港獨議程提上檯面,決定親美講人權定親中講愛國,亦只會係時間嘅問題。「人皆生而平等」可能係神話,但相比起意圖統治世界嘅中國夢,孰好孰壞,香港人不妨保持一貫勢利,對自己誠實。