十幾廿歲嘅時候，我從未想像過要成為飼養寵物嘅人，就連自己應死應生，生而為人所為何事都未諗得掂。以前總係受人生如何努力方會留痕於史所苦，但當改變從天而降，現實原來自然驗證得到自己確實理解每個靈魂都係無可複製，每次相聚都要全力以赴嘅道理。不知不覺間，關於生命之重，關於家庭之義，已經因為照顧寵物而略知一二，自身僅存青春亦終於為沉重權責所消耗淨盡，一去不返。
寵物之所以稱為寵物，而非動物，大概就係因為由唔知幾時開始，人類社會就已經演變得過於殘酷。當部分人類以想像力突圍而出，身分轉換為所謂萬物之靈，繼而自視為眾生之尊，征服之神，萬物本應有靈嘅自然道，亦隨戰爭同開發嘅速度而避走至世界偏遠處。遇神殺神，皆因貪念起，人心不足，萬惡由心生，為應付需求，為超越敵人，自我膨脹嘅部分人類一方面將非我族類趕盡殺絕，另一方面又將可以控制嘅物種人種安插於自身理想世界內作為點綴。從大膽實驗而未必小心求證，去到新教倫理與資本主義精神，寵物嘅意義，往往只係彰顯人類屢屢創新或自命尊貴之附屬物體，一如最初綿羊山羊亦不過為牧者所食所殺之牲口，以誠相待，未免太過不切實際。
西方社會步入工業革命時代，都市成為勞工同中產嘅聚居地，遠離舊生活嘅都市人因為遠離大自然而覺得寂寞，追求陪伴，同時炫耀之心仍然未息。求利之徒睇準需求，開始繁殖動物圖利，各種刻意育成嘅純種混種寵物品種隨之而出現，人造寵物天生即註定受難。大自然降災動物，責在大自然，但當災難與天無尤，人類就難辭其咎。當人嘅想像力可以大膽假設到殖民火星，但簡單如現世動物之幸福，則竟然要走錯一大段冤枉路至回歸正途，可見西方科學其實唔一定夠科學（science is not always scientific）。一日千里之錯覺，需求滿足之表象，可能只係因為科學狂人皆膽大妄為，而英雄為證明己見不惜不斷犯錯亦只係出於冒險需要，畢竟，不論係研發毒氣定原子彈， 犧牲嘅都只係其他人同其他動物，人命係咁化學架喇。
喺我接觸邁仔之初，我同樣安於生命不過一場實驗因此不妨隨意嘅糜爛之中。練習寵愛，令所寵之物享有比存活於大自然更高之生存機率，並非我嘅首要目標。我只係好工具理性咁奢望，飼養寵物會觸發飼養者嘅同理心，令佢成為更好嘅人。我仍然記得，五年前嘅同樣日子，有意成為飼養者嘅人突然就帶咗一隻眼都未開嘅貓返屋企，然後我就提議，假如真係想養，請展示收養寵物嘅應有誠意，例如拎兩萬蚊去同家母講，你係準備咗基金。家母生前昧於自己大約半年後將會病死之事，本來認定白頭人送黑頭貓係徒添傷感，但因為基金已備，口頭承諾為信，飼養寵物大局初定，家中就從此出現一隻寵物，一致通過。
然而，不論係人命、貓命，定係承諾，始終都係極其化學，交低錢財作保，定係苦口婆心，都唔會扭轉到去意已決嘅人心。因為有人棄置，只好有人拾遺，繼續飼養寵物，輾轉就成為只屬於我嘅責任。當仁不讓嘅真正意思，喺呢次經歷之中，我領悟殊深。稚嫩時期嘅小朋友同小動物，總係最惹人憐愛，因此真正嘅愛，應該要持續至往後，先至稱得上持之以恆。睇返當初飼養者嘅熱情洋溢，既視感突襲視野，我彷彿見到自己嘅童年照，見到將要飽受自我質疑嘅年少自己，見到後來決定半放棄嘅人原來最初都有過燦爛笑容。有前車，所以憂慮自己會陷入輪迴，有憂慮，所以強迫自己尋求突破，於是待人冷酷，首先將虐待常態化。論殘酷，歷史上嘅征服者自然殘酷至極，但輪迴中嘅棄養者，其實同樣猛暴，同樣大膽妄為，因為智力未啟嘅心靈，最為易欺，最易混淆無能與無為。
正式接管寵物之後，我犯過險過剃頭嘅錯，急性慢性都有。因為我看管不慎而跌咗佢落地下，衝到落去抱起，佢成個軀體微微顫抖，返上樓都震咗一輪。因為我將佢裝入出街袋，想話帶佢去遠少少，但佢喺入面唔耐煩，不斷用頭撞隔網，最後撞到對眼全晚流眼水，大驚一場。又，因為我自己精神唔夠飽滿就勉強自己，喺散步之時，下意識判斷有誤，連累佢從略高處墮地，好在佢惶恐到噴出一地屎尿之後都係向我方向跑近至平安無事。更莫講，在外行走江湖時不時就會遇到令人難以招架嘅路人，在內則要每日留意各種身體狀況，包括精神狀態、大便質素、攝水量、皮膚乾濕等等，怕自己養出一隻腎病貓，怕自己錯過顯而易見嘅不祥之兆，怕自己稍一不慎就造成千古恨。
再加上我手中嘅呢隻寵物天性貪玩多過貪食，渴望摸索，不斷出走，我必須份外警惕，免生意外。出入家門都要小心翼翼，只因佢成日都會偷雞，試過太多次奪門而去，嚇到人一額汗。不得不帶佢外遊，而又承受唔到放養嘅後果，呢種生活顛覆我起初對於養貓嘅預期，亦令我心靈韌力練出前所未有之水準。寵愛到底為何物，幾時應該合理拒絕，幾時應該靜觀其變，幾時應該及時抱起，每一日同住，每一次去街，我同女朋友例必檢討改進，從未疏懶，因為我怕萬一疏懶，不幸就會尾隨而至，而人生同貓生從來唔會有second take。無為而治，知易但行難。
於是我只可以盡力而為。放養，等同死路一條，所以要戴繩。出街，隨處有車有狗，所以要有車。長玩，食完再抖再玩，所以要備袋。嘴刁，又會營養不良，所以要爆買。我深知流浪同出走嘅分別，所以既然負責飼養，就必須努力營造安全感，令呢隻寵物喺都市之中都感到自在。探索嘅先決條件係有家可歸，一如旅居嘅先決條件係擁有護照，否則就只係難民，而非遊子。一次闖蕩，歸來安心，又會期待闖蕩，美好回憶不斷累積，新鮮叫聲不斷解鎖，犧牲嘅只係人類嘅自由，而非任何人命貓命。出走，本質上就係任性，而且感染細菌病毒風險極高，但因為佢嘅勇氣難能可貴，我地只好全面配合，希望佢享受貓生，有想留戀世間嘅意志，以貓齡計可以長命百歲。
最近一次，佢堅持跟人類坐長途車去友人屋企（本來怕佢捱唔過車程），點知去到佢盡興之餘，更發現咗原來呢個世界有種傢具叫碌架床。一向勇於滋事嘅佢自己思考方法，終以大小不一嘅紙箱為踏腳石登上高處，人類目睹一切，對於佢再一次排除萬難達成目的而驚喜。過咗一段時間之後，佢突然發現屋企原來儲物房都有紙箱，可以嘗試同樣方法挑戰儲物空間最頂層，於是佢就第一次攀爬上去，得手之後相當招積。相處五年，由最初不斷衝門離家，唔自由寧願自殘，到日常中從未止息嘅各種一意孤行，我謙卑以對，明白到寵物嘅生命力同想像力其實絕不下於人類，只係部分人類因為心智發達而對原廠設定過度自信。
人類嘅生活觀察，以及寵物嘅鍥而不捨，其實都完全符合科學精神。但因為知道貓生人生皆有涯，每思及失去之輕易，人就急激，無法放鬆，然後心念念追求成效。我不斷自我勸誡，生活猶如揚帆在海，航行切忌瘋狂調整航道，船到橋頭自然直，但處理自己卑賤性命可以，處理寵物崇高靈魂未敢。於是我變得科學，變得焦慮，變得執著，人生大多數時間都無法應用自己理智相信嘅信條：動物在外，順其自然，存活率本應只有一半。人有多大膽，寵物有多長壽，誓要與天鬥，下場必然如此。
然後我只可以擁抱命運，奉時間為神明，奉寵物為神明，奉科學為神明，無所不拜。心靈因為執著而受到束縛，信仰則因為畏死而多元發展。某程度上，當我體力透支，靜心省思，我發覺我已經唔知道到底飼養寵物之樂何在，痛苦加乘，年復一年，遠遠壓倒小確幸。To be or not to be，或者我仍然同佢共存，仍然求佢健在，只係想感受人生本來就係日復一日嘅推動巨石然後回到起點。又或者，可能只係因為呢舊巨石同其他巨石相比，只係迷你石，正好當作健身。
呢舊迷你石，大膽逃出人類家居，去街自然學到新技能，又識得將學到嘅方法運用喺其他情況，即使要對人類小懲大戒，發動東京大轟炸，都只係因為排便未清就趕住衝出客廳導致。我雖為負責寵幸迷你石之人，每次外遊為佢開路，每次居家為佢勞神，但佢亦為我開示獲得心靈自由嘅途徑，令我搵到心之所向。自由，並非一定要靠對外開拓，而係可以喺有限空間內耐心堆疊，因為同理心同專注力，先至係人類之所以為人類嘅真正原因。曾經嚮往嘅千山萬水，苦行壯遊，如今全部化約為公園野餐，商場漫步，即使要我規行矩步，要我提心吊膽，但我無悔，而且心安理得，因為我相信我透過當仁不讓，感受到有能者居之並非苦差——可以寵愛以至溺愛他者，為他者解決疑難，共同面對本來已經殘酷有餘嘅世態，承諾今生今世都會守候於身邊，立志，然後以行動證明自身雕石有成，已經係生而為人嘅無上光榮。石本死物，推則生動，動則有靈，靈則見情。生命匆匆逝去，但再細小嘅石堆都會留存千年，留存之物，就係人間有情嘅見證。
生命中曾經招惹過嘅各段緣分，有好有壞，無仇無恨回望過去，都仍然難免會有憤慨有惋惜有灰心，唯獨決心陪伴守護同邁仔共度一生呢個決定，總係幸福大於勞累，甘願多於委屈。假如人生確有死而無憾嘅福氣，最接近無怨無悔嘅經歷，於我而言，就係默默照顧寵物嘅呢五年。憶起少年時代，不時有人援引龜兔賽跑故事對我說教，批評我不可一世，自以為聰明，遲早會輸畀烏龜云云，但我根本就係體格短小、行動緩慢嘅烏龜，可以做好嘅就只有獨自低頭練習閉氣潛水，勉力維持心跳呼吸正常。我嘅寵物，係最通人性、同我交流得最好嘅靈魂，亦係無懼挫敗嘅超級英雄，將我從將近崩潰之心靈世界拉上水面嘅勇者。若非有佢作為寵愛嘅接受者，就唔會有見過鬼但唔再怕黑嘅我。
與人類相處，人經常對人強加己意，美其名為紀律，最後演為傷害。與寵物相處，除集中練習愛護之外一概為誤，因為自然自有規律，應當遵從天道。今後我將繼續盡力而為，應寵則寵，應物則物，祈望神明在上，真有好生之德，保祐邁仔平安健康，人間地獄之門，是非果報之命，我受即可。
逆嘶亭 