引緊急法揭示帝國極限,區區開花降低抗爭成本

 
中共點樣對付香港,從來係世界觀察中國距離解體尚有幾遠嘅監測對象,港共引用緊急法去通過禁蒙面法,正係中國帝國極限又再見頂嘅表現。中共目前期望以大舉鎮壓快速消滅香港抗爭主力,繼而集中火力處理台灣問題,再將地方力量逐個擊破,但國家機器維穩資源同能力有限,要香港長期戒嚴係絕對唔可行。故此,香港民族只要留前鬥後,保留民族精銳,堅持到中國內戰爆發,東亞秩序重整,獨立之機自會出現。
 
抗爭策略,必須以不利中共為目的,而損害香港繁榮經濟,串連中國地方起事,就最有效促使中國解體。香港主權移交至今廿二年,中共一早已經完全滲透香港各大政府部門以及商業機構,大量中共黨員特務以香港人身分同免簽護照為掩護經商謀事,已經係人所共知嘅公開秘密。所以,保持香港繁榮安定,就等於為中共政權續命,白手套角色根本不利香港人。廣大香港平民無法從中獲益,但又要為少數權貴付出人權自由,接受置諸死地而後生嘅路徑,其實至係切實可行嘅求生之法。
 
反送中抗爭發展到今時今日,自由陣營大國都只係口頭幫忙嘅關鍵原因有二:一係香港現時主權屬於中國,發生任何動亂,中共都絕對有權鎮壓;二係香港赤化之深不可測,令各國政府傾向靜觀其變,只會兩邊落注,多於為香港為戰。美國之國家安全,以美洲歐洲為地盤,只要世界秩序暫時穩定,中共唔刺激美國,絕對唔會去遠東地區開戰,此之所以極少數國會議員表態譴責香港警察確實令人振奮,但香港事務對國會而言始終唔係頭等大事——即使六個議員都有可能加入遊說,法案通過與否都係未知之數。而日本插手干預中國國內事務,亦必然會成為導致東亞局勢升溫之罪人,如此進取,中共就會有得搶佔道德高地,以軍國主義舊事要脅日本。所以,雖然美國身為自由陣營領袖,而日本亦身為唯一有力重塑東亞政治環境嘅國家,雙方暫時都唔會有任何實際軍事行動支援香港,香港人只可以靠自己支撐落去,直到中國出現潰敗跡象為止。
 
殺雞儆猴同殺雞取卵,係形容現時香港嘅最準確成語,亦係中共帝國主義最常用嘅治國同救亡手段。前者,即以鎮壓香港示威者去阻嚇中國各地平民,提醒中國人唔好造反——中國人係恐懼共同體,個體之間缺乏互信,永遠無法團結,槍打出頭鳥,真係會令到其他未出聲嘅人自我克制,自動投降。後者,即粗暴破壞一國兩制設定,消耗香港社經資本以救中共於危急——中共專制管治,無法護養自由市場平穩發展,每逢經濟增長停滯,就只可以收割民間盈利及技術,盡量拖延徹底崩盤發生。當未來經濟繼續下行,中國將有大量流民聚眾起事,有權有勢者亦會重演中華民國時期嘅地方割據,但民變政變成為風潮之前,中共明知劫數難逃,必定會垂死掙扎——血洗香港,扯埋香港陪葬,就係香港人要做好心理準備嘅真正大變動。
 
持久戰開打,中共就要增加維穩費,香港要錢,國內就會缺錢。此之所以,令香港警察同中國武警疲於奔命,冒險出動,去到現場又徒勞無功,就係勝利。已經進行緊嘅各種抗爭形式,一定唔可以停,至少要做到下年一月台灣大選,但一定要以減少傷亡同降低成本為上,同埋避免入黑之後苦戰街頭,任由對家魚肉。堵路佔領,可以喺午飯時間發動,港島黃金地段,效果尤其顯著,而且成本極低——大家放飯時間唔同,馬拉松式接力,就已經可以持續至少兩三個鐘,甚至可以迫使大小公司提早放工。今個禮拜三中午,中環有遊行由遮打花園出發,參加者好快就佔咗兩條馬路,而到今日禮拜五中午,就已經火速佔咗四條,好多遊客都在場見證,效果不下於機場和理飛。十八區除之以五日,每日有至少三個地區堵路,每人只要每個禮拜付出一日lunch hour,就已經大幅增加中共管治成本。
 
另外,晚飯之後嘅十八區唱歌集會應該繼續,一黎凝聚士氣,令共同體想像更加堅實,而各種口號歌曲流傳,都有助抗爭文化向社會各階層輸出,更新大家對運動嘅想像(例如小朋友都識唱,就係文宣成功)。各區陣地戰有傷有死在所難免,但為分散警力,避免好似以往咁集中某區開打亦係好嘅演化,大家繼續發揮創意,就會造成損耗。當閒日抗爭成為常態,食飯去街都係反共,人嘅心態同成個生態就會隨之而逐漸改變,長遠而言,日日抗爭絕對好過喺放假日子去捱打。
 
中共大限將至,香港民族精銳一定要精進自身,分工合作,否則就會前功盡廢。廣交益友,互助互信,建立本地地下組織及海外同胞聯誼組織至係長遠之法。香港獨立將會同中國解體同時發生,大家嘅血汗係唔會白流。撐到香港國魂鑄成之日,大家就會知道,付出短短十年時間去建立一個可以真正安居樂業嘅香港,係絕對值得。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s