IDOL靈魂自我毀滅之觀察:由迷幻王子變成迷路王子

閒來無事中意睇選秀節目作消遣嘅一大原因,係可以直接睇到人點解進步,點解失敗,事關舞台將一切都放到最大,人格如何,面對目光,即刻無所遁形。而得意嘅係,聲林之王第二季值得睇,係因為有得睇林宥嘉嘅自我放棄同蕭敬騰嘅始終熱情形成強烈對照——就算已經有所作為,只要選擇退而求其次,人都可以即刻跌返落低位,林宥嘉就係最佳例子。

大多數做唔到明星嘅人,都會有各種理由去解釋佢地嘅失敗,但有自覺嘅人係從來唔會搵咁多藉口。莫名奇妙就走音了、我也不知道、我想是緊張吧,呢啲都係不知輕重嘅反應,佢地唔知有得踏上舞台呢個機會有幾難得,而導師嘅時間又有幾寶貴。你唔努力,係對人地唔尊重,更係對自己唔尊重。另外有類參賽者又係好有問題,就係導師畀意見,佢係即時就答知道或者明白,但如果真係有聽入耳,係唔應該秒覆。可以明得咁快,本身表演就理應唔會犯錯,而既然犯錯,就即係根本唔係真正知道嗰種錯誤係有幾致命。

不過今次最致命嘅唔係參賽者,而係林宥嘉,因為佢今季已經對唔住導師呢個身分。講評欠缺應有深度,揀人嘅理由九唔搭八,不停嘗試炒熱氣氛幫參賽者拉紅線,完全係無法集中精神去做好個節目。上季佢心理健康嘅時候,同蕭敬騰係合拍得好緊要,兩個多次有相視而笑嘅畫面,而蕭敬騰亦成日話林宥嘉講嘅就係佢嘅諗法,大家對參賽者嘅睇法都係一語中的。但係,今季佢係明顯失去咗靈魂,去到蕭敬騰都好錯愕,然後要加以修正嘅地步——第八集中有個參賽者叫陳瑽,係蕭敬騰間公司,林宥嘉話「如果我是老蕭的話,今天我會覺得很驕傲」但蕭敬騰不敢苟同,就以「但是你不是我啊」同埋「我不知道這個好是因為這是一首合唱作品還是妳以後也可以這麼好」去回應,亦即係話佢仍然未見到佢有可觀嘅獨唱能力,未值得以驕傲形容。呢種分歧,唔單單係意見分歧,而係因為其中有人連個人生活都未處理好,畀思緒影響工作,而呢啲觀眾都係有眼睇。兩位拍檔主持雖然有力獨自精進,但真正主持大局嘅只係蕭敬騰同Lulu

我理解伴侶同家庭可以點樣透支一個人嘅能量,而愛情路上嘅不進則退,係絕對會驅散人嘅靈氣。林宥嘉靈氣消散,係因為佢唔夠勇敢,唔肯去面對禁忌——同鄧紫棋分開之後,佢未整理自己,就直接用婚姻去逃避現實。當年林宥嘉同鄧紫棋一齊,佢係激情洋溢,雖然最終搵唔到最佳磨合方式,但兩個人係有靈魂交流,有engagement,亦即係話又開朗又具音樂造詣嘅對象其實唔係唔適合佢。當一個人曾經達到某個高度,曾經滄海,係咪可以同返甘於平庸嘅丁文琪追求結婚生仔呢啲所謂愛情?我聽到〈少女〉之後,已經決定唔再聽佢以後嘅新歌。

我一直有聽佢嘅歌,IDOL演唱會嗰時,佢仍然有一定魅力,但同時我亦極之留意佢呢十年所有訪問嘅內容同反應,見證住佢嘅靈氣消散。youtube上面搵到嘅訪問,基本上我係睇曬,而我睇到嘅係佢對音樂嘅堅持,更係佢一提及舊事就無法自拔嘅空虛。鄧紫棋仍然係敏感人物,而林宥嘉亦仍然未從陰影之中完全成長,所以佢情緒總係會波動,而佢應對嘅方法就係後退,一如當年佢推曬全屋企人去應付過分主動嘅鄧紫棋。情緒波動,正係因為深受觸動,而觸動過後點樣維繫,或者錯失之後點樣理解同消化呢類型對象,然後思考自己有幾大程度上適合同呢類型對象交往,正係林宥嘉做得唔好嘅地方。

This is a life choice,而林宥嘉選擇咗退縮,鄧紫棋選擇咗進步。鄧紫棋喺分手之後,係不避嫌咁談及舊事,亦有主動講從中學到乜嘢,而林宥嘉係絕口不提,甚至喺上季聲林之王因為參賽者申力安唱〈光年之外〉而失神,完全畀唔到合理意見。前奏一響起,鏡頭掃到佢,明顯見到佢係深深吸一口氣,然後努力管理表情,而去到中段,就故作投入,實力一般嘅申力安可以引起佢如此反應並唔合理。反觀鄧紫棋喺某中國節目聽到有參賽者演唱〈說謊〉,佢嘅反應就係反白眼同尷尬傻笑,可見佢運作如常。就好似林夕喺〈綿綿〉寫過,「前塵就似輕於鴻毛/提及心底苦惱/如像自言自語說他人是非/多麼好」,有表情係代表自如,代表你承認同接受呢段感情確實存在,而克制表情,置身事外,嘗試撇清關係,就更顯避諱之意。

兩個都係以音樂為志業嘅人,當年年少氣盛,有意見有爭執自然會擦槍走火,不足為奇。分開之後,林宥嘉唔去思考嘅係,辛苦過後其實會有成果,而呢種痛心拉扯,丁文琪係完全刺激唔起,而具有一定力量嘅伴侶(就算唔係鄧紫棋都可以)至係佢理應去不斷追求嘅目標。丁文琪所提供到嘅都絕對係愛,但呢一種愛只係廉價支持,事關佢只係知道音樂人係林宥嘉最理想崗位,但佢係無法理解林宥嘉嘅音樂世界。亦即係話,就算而家林宥嘉話唔再唱歌,去做警察,去開餐廳,去做啲同音樂完全無關嘅事,丁文琪都絕對會全力支持,因為佢支持嘅係伴侶本人,而唔係因為理解而支持,而呢種支持永遠都係次一等——如果每日要我返到屋企對住只能提供廉價支持嘅伴侶,唔會明我有關中國解體同東亞秩序重整思考嘅伴侶,我寧願單身,因為我清楚知道自己要嘅生活係乜,然後先再選擇伴侶,而我深信處理好自己再去選擇伴侶,至係正確步驟。

所謂小清新嘅愛情,係咪真係適合自己?一個只可以用漂亮去形容嘅伴侶,係咪真係適合自己?一種唔會令自己情緒大起大落、感受生命嘅愛,係咪真係適合自己?如果最欣賞對方嘅只係先天條件同佢有幾努力去照顧家庭,咁到底自己嘅追求又係乜?其實鄧紫棋外貌都唔錯,但當年佢甚少提及鄧紫棋嘅外貌,而係講佢音樂才華,因為佢喺對方身上見到嘅係由內而外所散發嘅光芒,而唔係由外而內嘅所謂漂亮(林宥嘉對現時伴侶嘅形容十居其九都係漂亮)。〈兜圈〉有句歌詞係「有一種浪漫的愛/是浪費時間」,但人生苦短,目標遠大,金曲獎都未拎到過,浪費時間點解係好事?不進則退,正係如此。

事已至此,我大膽預言,一日同丁文琪一齊,一日林宥嘉都唔會拎到金曲獎。金曲獎唔係關乎榮耀,而係一個目標,係專業人士對歌手嘅肯定,而我從來欣賞嘅都係專心做音樂嘅林宥嘉,而唔係連導師本分都盡唔到嘅林宥嘉。記得IDOL演唱會香港場,林宥嘉又有講廣東話,而佢水平之高,係超越大多數台灣人。駕馭另一語言,從來唔係容易,但點解一個人曾經會咁努力去學廣東話?學廣東話,正正就因為愛情可以唔浪費時間,更理想嘅愛情毋須停留喺簡單愛,而係應該要有令人義無反顧去努力嘅勇氣。

我曾經以「一山當可藏二虎」去形容蕭敬騰同林宥嘉,因為佢地兩個都獨當一面,無分高低,值得推崇。然而,虎之所以可以一直威猛,係要自我鞭策,勤於捕獵,唔可以自困於動物園呢種唔適生嘅環境。雖然林宥嘉以樹自居,又係所謂迷幻王子,但認為自己係較為平靜陰柔,都應該要有平靜陰柔嘅精進路徑,呢個唔係原地踏步嘅藉口——如果失去奮鬥嘅心,失去做自己嘅堅持,咁就永遠唔會成為一棵令人仰望嘅老樹,而成為受寄生感染而腐爛空心嘅老樹,只能眼望其他生物發光發熱,成為各自界別領域中嘅偶像。

〈少女〉之中,歌詞提及「偶像的位置/一夜間/全都換成/你和巧克力」,我無法想像呢句說話出自林宥嘉之口。而「浪漫的愛情再定義/快樂回到三年級」所描寫嘅浪漫,要透過退化而得到,亦係令人失望。人嘅年紀唔會倒退,因此成年人永遠唔可能擁有三年級嘅純粹快樂,但問題係,點解成年人就唔可以有成年人嘅快樂?如果同對方相知相遇,可以將音樂貫穿生命所有細節就會快樂,咁點解唔去追求一個可以同自己一齊不停創造快樂嘅人?受過傷害,要稍事休息唔緊要,但休息之後,連偶像都放棄,連浪漫都扭曲,咁樣嘅人係唔會有成就自己嘅一日。只有提起前度都可以雲淡風輕,提起傷口都可以坦然面對,人至會有繼續成長嘅可能,而思想蛻變同事業突破,從來都係緊密相連,無法割裂——只有飽受風霜但仍然堅持復健治療嘅人,至有資格肩負導師之名,成為他人心中嘅偶像。

最後,如果你覺得周生生廣告係好sweet,以上分析你應該唔會消化得到,我只能希望你繼續精進,有日會睇得明。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s