近日戴耀廷終於都講法治已死，不期然令我諗起當年自己仍然係大學生嘅時候，喺佢宣傳和平佔中嘅講座之中對佢提出過嘅質疑。曾經我都認為，成日話要信香港有法治嘅人確實deserve「法律膠」呢種稱呼，但法律膠之所以膠，只不過係因為佢地只知法治精神而昧於政治現實，而其實理解法治精神對於人類社會具有重大意義，都算係達到咗一個唔低嘅智力門檻，因為呢個世界係有好多人仍然支持人治——華夏食人族，以及部分尚未擺脫華毒思想嘅香港人，就從來都唔明法治精神。
無可否認，香港嘅法治，由人大可以釋法成為定制開始，已經註定消失，但呢種只係法治已死嘅表面意義。法治係咪已死，其實係視乎司法制度所盛載嘅法治精神，係咪存在於社會共同體嘅精神世界之中。如果認為香港而家無法無天，香港民族就唔再擁有法治，咁其實就係睇輕緊嘅香港民族嘅修養同智慧。我喺一篇名為〈法治作為美好回憶〉嘅舊文講過，真正重要嘅，唔係呢一刻嘅司法制度健全與否，而係香港民族到底想唔想繼續喺具有法治精神嘅國家裡面好好生活，而反送中之所以引起軒然大波，就係因為香港民族非常重視法治精神，重視到不忍見住中共就咁將佢摧毀，至會挺身而出。有法治，係香港之所以異於中國嘅關鍵，放棄法治，則會係香港有可能會不敵中國嘅缺口。
法治其實從來唔係乜嘢複雜到一定要native english speakers至可以接觸嘅神科，修讀法律嘅學生，只係以了解法律為分工，代理所有民族同胞去解決社會問題。香港人首先相信法治，至會支撐得到法律系嘅存在，甚至視法律係神科，如果大家都覺得人治高於一切，拉關係有用過打官司，香港嘅大學就唔需要有法律系。法治作為形式，功能係反映共同體嘅共識，係個體想和平共處嘅先決條件。喺一啲偏遠地區嘅小型部落之中，佢地未有設計文字，亦未有產出漢謨拉比法典，甚至可能連部落領袖呢個角色都未必長期有人在位，但佢地都係基於某啲共識去共同生活。呢啲共識可以係全部人都唔准踏足禁忌森林，可以係殺人就要填命，都係共同體為咗維繫秩序而協議出黎嘅共識。所以，法治雖然係定義現代國家嘅其中一項條件，但尋求共識嘅需求係紮根於任何類型嘅人類社會——華夏食人族推崇人治，無法消化法治，正係中國之共識。
左膠會話，人治同法治其實都係選擇唔同，屬於文化差異，但由於我唔係左膠，我會坦白承認自己對於法治嘅偏好，因為法治令香港人同中國人顯得截然不同，亦有助香港民族嘅生活過得更好。假如香港已經係一個主權國家，有法可依，有法可守，有事可以搵律師幫手，呢種生活係勝過居住喺中國一萬倍，因為做香港人毋須提心吊膽，戰戰兢兢，更可以無懼於任何政府惡法。有咗法治呢層秩序，社會內部就可以緩慢而平穩咁更新秩序，所謂立法修法，就係共識修改加疊嘅過程。如此過程係極之漫長，極惡之人改過過程亦可能係遙遙無期，但選擇人治，就係預先扼殺所有人改過遷善嘅可能，以擁抱絕望為唯一共識。
回歸現實，我認為香港民族嘅基本共識，應當係殺人有罪，即使係曾經犯罪嘅人，佢都應該有生存嘅權利。犯罪者必須受到相應制裁，而執政者同執政者所代表嘅國民，都應該要就罪行本身作出合乎正義嘅制裁，呢個亦係法律係寧縱勿枉而非寧枉勿縱嘅原因。假愛國之名，假正義之名，假人民之名，人類已經喺上個世紀屠殺咗無數同類，一切生靈塗炭，就係因為好多人類唔記得咗人之所以為人嘅意義，達成咗背離人性嘅魔鬼共識。納粹主義同列寧主義，都係源於民眾選擇接受一種絕對荒謬嘅言辭：為咗達成理想，殺人都係必要，人治都係必須。下限一但調整，底線一但出現裂痕，烏托邦就會變成人間地獄，萬劫不復。
如果建立新香港，一定要不擇手段，我寧願直接滅亡，因為不擇手段呢種態度，本身就意味滅亡。不擇手段，只係無法建構同參與秩序嘅人類逃避精進嘅藉口。不擇手段嘅人僥倖試到甜頭，下一步會做嘅就係建立先鋒隊，鼓動更多人不擇手段，人類嘅下場就係辛苦建立嘅共識一概粉碎，最後距離和平共處更遠，距離地獄之火更近。如果人類確有必要研習歷史，嚴防人治思想不定期反撲導致秩序瓦解崩潰，就係人道主義者嘅應有之義。
香港民族要建立國家，最重要嘅就係要勇於承擔起維繫共識呢個責任。目前香港法律已經淪為惡法，大家有目共睹，然而戰勝一方任意傷害戰敗一方，好快就會無法承受後人對於歷史真相嘅探求之心，誤解復仇之義嘅話，就會扭曲將來香港民族嘅走向，無法正確實踐轉型正義。如果未來香港人獲得自由民主，就以一人一票方式投票處決黑警，咁就即係重蹈紐倫堡覆轍，因為短期仇恨而為長期仇恨深埋種子，百年過後回望，必定係百害而無一利，將人生焦土主義無限延續。人生焦土主義者，就係缺乏想像人性嘅能力，去意識到公正審判已經足以彰顯正義，亦即係話，佢地自身偏離正義，至會對他人以及社會都投射出偏離正義嘅人治主張。
香港民族嘅實質存在，本身就係無數成文共識所聚合而成嘅鐵證，所以只要民族一日健在，民族精神就一日不滅。而既然民族想繼續向前，就必定要喺立國之後努力重建法治。真正愛護香港民族嘅人，真正知道法治精神點樣形塑香港人思維嘅人，係絕對唔會因為某位學者終於承認法治而死就灰心喪志，亦絕對唔會為求清算敵人而喪失理智。只有堅守原則，相信人性光輝，香港民族主義至有可能成長為健康民族主義，一舉將華夏食人病毒驅逐離場，繼而以香港人嘅豐厚共識為基，建立一個合乎正義而前途無量嘅國家。
逆嘶亭 