每當言及香港獨立，大多數人都會認為主張激進，輔以諸多理由否定，但當反問佢地喺現行局面之中，可以點樣爭取民主自由，大眾往往都係啞口無言，忽然失語。呢種情況之所以常見，係源於大家都未意識到獨立從來只係手段，而非目標，同時太受中國灌輸嘅歷史框架所影響。事實上，只要大家認清兩點：一、香港嘅終極目標係爭取自由，以及二、中華文明以及中共體制嘅核心都係反對自由，咁就會更易理解獨立作為手段之必要，而獨立路上嘅各種抗爭模式都自有意義，毋須內耗。
要洗刷香港人對獨立嘅恐懼，首先要談論香港人以至世界嘅選擇性失憶。自中共開始部署奪取香港起，香港人嘅國際視野亦都開始自我設限——由港英時代嘅冷戰思維，逐漸倒退至中國主導嘅華夷秩序，格局日窄。過去，香港雖未至於喺國際間舉足輕重，但至少喺東亞及東南亞區域佔有一定地位，東西陣營前哨站之名，可謂當之無愧，因此從來都廣受世界關注，亦係世界窺探中國嘅最佳窗口。其後，英國一方面內外交困，自顧不暇，一方面又誤以為中共將會改變，香港落入中共之手，香港就成為西方掌握中共進步幅度嘅實驗場。至此，香港可以話係中共測試西方反應嘅緩衝區，英美檢驗自身眼光嘅參考對象，亦係美國試探中共同世界秩序距離尚有幾遠嘅試金石。
因此，自香港前途商議有成之後，英美社會都一直密切留意以及討論香港局勢，而主權移交前嘅兩個月，《紐約時報》一篇名為〈救助香港〉嘅社論就直接提到香港嘅價值。「而家，美國要挺身而出，阻止香港嘅自由社會遭受破壞。而香港嘅主權移交，只係重大問題嘅其中一部分。呢個更重大嘅問題，就係中國將會以強國姿態擠身強國之林，呢個恐怕係現代世界所迎接嘅最艱鉅挑戰。十二億人口同不斷發展嘅經濟，加上渴望成為軍事強國嘅志向，中國將來勢必成為美國嘅對手。」中共接收香港背後嘅意圖同佈局，社論作者心知肚明，可見當時國際形勢絕非不明朗，大家都知道中共野心必須提防，只係中共姿態低調，而美國又無意出手，於是以美國馬首是瞻嘅各國都不了了之，靜觀中共變化，香港亦唔例外。
然而，香港人呢種獨善其身嘅態度，就為日後中共嘅為所欲為，大開方便之門。中共以一國兩制之名立約，意在善用香港英治遺產，將香港逐漸塑造成中國版新加坡，協助中共走資，掩護黨內密謀顛覆世界秩序嘅如意算盤，本來計算未至於高明，但多得香港人隻眼開隻眼閉，中共就得以上下其手，任意魚肉，而西方亦因為出師無名而無法插手援救。中共多次干預香港內政，一國兩制名存實亡，但香港泛民議員出訪美國之時，竟然向美方表示香港狀況尚好，力證《基本法》行之有效；中共大推送中惡法修訂，香港司法獨立出現裂痕，但香港百萬民眾上街之後，竟然只係要求撤回修訂，而非爭取完整主權，從根本上遠離中共管治。當香港人自上而下所選擇嘅，都係任由自由社會慢慢腐爛，甚至為中共隱惡揚善，試問即使世上有識之士早有先見之明，又如何提示香港自由之路何來何從？
中共自立國起，就視高舉自由旗幟嘅美國為敵對國，而戰略方向，就係吸納願意靠攏自身嘅小國，逐步擴大勢力，最後一舉殲滅敵對國。呢種模式，其實同歷代中華帝國嘅經營模式一脈相承，而香港就正正係近在中國周邊嘅屬邦，有待收復，繼而重新納入秩序體系，滲透吸收。中共對世界輸出嘅一套，係文化羈縻加以力服人，文化之中所承載嘅核心價值就係最原始嘅權力同暴力，中原地區戰國末年秦國尚未擊敗其餘六國前所刻於竹簡之上嘅《秦律》，就已經具備呢種原始思想——周邊諸國，可分為臣邦、屬邦及他邦三類，臣邦為已經臣屬嘅諸侯國，屬邦為位於國內嘅少數民族，而他邦則為勢力均等嘅敵對諸侯國。中央力量要得以維持，就要臣邦拱衛，現實中嘅臣邦，就係武力上對抗唔到中共嘅中國各省；而需要擴張之時，就需要改造異質政治共同體嘅思想信仰，令屬邦如香港澳門相信，即使文化未能相容，都要記住武力無法對抗中共；當勢力範圍之內亂局已經平定，就係時候動員全國，向絕不屈服嘅他邦發動進攻，一較高下，而美國就係中共嘅終極對手。
每次中華帝國累積力量，呢種一雪民族恥辱嘅對外侵略就會發生，直至發現自己真係比唔上敵對國，敗興而回，就再一次韜光養晦，等待又一次嘅改革開放。漢帝國先係同匈奴保持貿易往來，到武帝時期至出擊匈奴，無法北上之後就議和劃界；唐帝國君主先贏得「天可汗」之名，然後於塔拉斯河戰役大敗於伊斯蘭帝國，無法西進之後就議和劃界；滿清帝國准許廣州通商，因鴉片貿易而對英夷先發制人，無法排外之後就議和賠款——呢啲歷史所反映嘅，就係一個個「改革開放—挑戰對方—韜光養晦」嘅循環，而七十年間中共嘅發展趨勢，其實仍然不脫中華帝國模式，分別只係世界已經全面開發，美國勢力已經深入亞洲，中共想避開民主改革浪潮，都已經無路可退。有中國學者曾經提出，中華帝國嘅治亂週期以八百年為一循環，但秦帝國立國距今不過二千二百年左右，粗略否定歷史潮流線性發展，以及經歷地理大發現後全球已經連成一體嘅重大改變，立論未免過於樂觀。
相比起迷信中國歷史會不停循環，明白到改革開放只係中共爭取時間積聚實力已為常態，去理解中共嘅改革開放，就會比較容易，因為中共提出富有中國特色嘅社會主義，只係意在稀釋中國進入世界秩序期間嘅本質上不相容，而非誠心求和。中共輸出新世代奴隸，為資本主義世界供應廉價工人以自肥，同時以自由之名掩飾國家暴力，促進資本集中，國內街頭圍板上宣傳嘅中華文明倫理觀，只係誘導民眾賣身工作嘅花言巧語。改革開放迎合以美國為首嘅新自由主義，中國民眾化身世界工廠，表面上係參與緊全球化，實際上則係暗渡陳倉，換取時間同空間去加強國家暴力。三十年間，中共鼓勵工廠興建，然後安插黨員於企業管理層監管營運，一邊粉碎民間自發組織工會機會，孤立工人，一邊以高壓手段阻止工人爭取公義，同時縱容富士康生產模式，放任資本家剝削工人，一邊保持國民生產總值增長，一邊任得馬克思理論中嘅勞動異化分解人性。呢啲西方國家早就經歷過嘅工業革命時代弊端，美國早就了解，但美國之所以對所有暴行視若無睹，就係因為西方國家各大公司都可以從中取利——減低企業生產成本，同時轉嫁環境污染。當中國生產成本逐漸增加，再無利用價值，初生之犢習近平又自以為反擊美國時機已到，二零一九年，就成為咗中國證明自己嘅民族復興時刻，同時亦係八國聯軍聯手關閉過氣世界工廠嘅時刻。
一八四零年至今，中國革命同復興嘅目標都係打擊西方霸權，而非融入世界秩序，因為願意接受美國輸出嘅世界秩序，就意味住主動瓦解以中國為核心嘅國內秩序，而秩序一亂，等同自殺。不論係滿清帝國，定係中華人民共和國，都承受唔到外來秩序對自身秩序嘅徹底調整。正如歐盟要建立，必須消弭德國稱霸嘅野心，秦帝國要建立，必須鎮壓六國國內嘅反動，自由陣營要擴張，亦必須解決反對自由嘅政治共同體，例如中國。中國為世所不容嘅根本原因，就係在於國內缺乏民主自由根基，一切疑似資本主義自由市場嘅表徵永遠都只會係表徵。
另一方面，美國亦係以類似方式攻陷世界，鞏固自身權力，最大分別只係秩序核心係自由，而非暴力。假如美國都有一套朝貢體系，佢所要求嘅就係所有國家都務必接受自由民主制度，以自由國家圍堵敵對國，而日本、韓國同台灣，都係美國嘅臣邦。香港人處於兩套秩序之間，對美國而言，就係心態難測嘅游離政治共同體——到底香港係想成為中共屬邦，致力消除自身西化成分，融入中國，抑或及時投向自由陣營，決心追求自由民主，寧為玉碎，不作瓦全？美中碰撞正烈之際，香港人若然忘記自身定位，忽視可行選擇，所得到嘅下場大概就只有昧於局勢跟錯大隊，最後淪為炮灰。
要民主定賺錢，要親美定親中，其實都唔係最急切嘅問題，因為香港人首要思考嘅係，到底我地想唔想成為炮灰，而如果唔想，思維又可以點樣盡快調整。如果我地渴望自由，就要堅決拒共，而要堅決拒共，就必須以行動證明自己。如果中共志在吸納屬邦去打擊他邦，香港人必須撫心自問，自己要唔要為取悅中共而得罪美國，要唔要為成為中國人而拋棄自由。要自由，就唔可以做中國人，呢點所有流亡海外嘅中國民運人士都心中有數，而中共擺出嘅專橫姿態，亦顯示出中共黨內已有共識，杜絕西方自由思想。根據中國國際問題研究院近日發表嘅〈國際形勢和中國外交藍皮書〉，其中嘅「國際權力日益由西向東轉移」，對美國「一超多強」嘅批評，以及有關「新一輪技術革命有利於非西方國家抓住機遇後來居上，撬動大國實力」嘅描述，可見中共仍然無意息事寧人，接受美國體制優於自身嘅現象。因此，如果香港忤逆中共意願，搵出爭取民主嘅可行辦法，就等同否定中共嘅官方文件，否定中共以暴力征服世界嘅春秋大夢。
故此，獨立與否，反而可以從長計議，因為大家慢慢就會意識到，點樣至係爭取自由嘅最佳辦法。而要掙脫「改革開放—挑戰對方—韜光養晦」嘅循環，必定要自外於中國。只要有意脫中，路線分歧都無關緊要，因為就算係和平理性反共，勇武抗爭反共，大家日後回望，都會發現原來喺香港獨立路上，彼此一早就係視死如歸嘅忠實戰友，無分高低，因為香港人嘅所有抗爭，都必定係為保護香港核心價值而生。
逆嘶亭 