今日香港獨立,明日台灣方可獨立

「今日香港,明日台灣」,係香港人最常誤用嘅一句口號,因為香港人一直熱衷於以自己嘅壯烈犧牲,去提醒台灣戒備中共,偏又從來意識唔到,自身嘅真正功能,係透過確立香港獨立,進而為台灣獨立製造機會。由於中國坐斷亞洲,持續擾亂地區秩序,嚴禁台灣獨立,因此,只有今日香港獨立,了結中國統治,他日台灣方會獨立,然後成個亞洲至會得到解放。簡而言之,要真正幫助他人,香港人必須自強自省,而無謂嘅苦行求饒,必須立即終止。

只有消滅中國,真正解放亞洲之日方會到臨,而要完成呢個任務,香港肩負重任,責無旁貸。自鐵幕拉起,冷戰開始,自由陣營與共產陣營一直勢不兩立,其中核心角力,源於自由係咪真係高於一切。目前,我暫時無意拆解自由何以必勝,但只要大家相信自由必勝,就已可預知中國必敗無疑,一如蘇聯之敗亡,避無可避。自從自由陣營成型,美歐日聯防蘇聯,世界嘅規則已經徹底改變——自由成為戰勝嘅唯一資本,得自由者得天下,反自由者失天下,而香港過去一直都係處於夾縫之中,靜觀其變。五十年代,中共緊跟蘇聯方向,一直對外輸出所謂革命,表面上係帶領世界通往烏托邦,但本質上係向自由宣戰,意圖還原過去嘅原始叢林法則——武力強者建立統治,武力弱者為奴為婢,瓦解人類生而平等之說,將人類文明往後拖行。六十至七十年代,史太林死,中共亦意識到自由陣營捍衛自由之意志極之堅決,於是疏遠蘇聯,調整國策,徐圖後計,表面上係態度軟化,但本質上只係策略性撤退,意圖壓迫人類自由以重建帝國之心從未消失。八十至九十年代,蘇聯內外困頓,試圖轉型,但自由之門開得太急,一鬆手即失控,最終倒台,中共則以改革開放路線欺騙西方,爭取時間,表面上係願意接受西方秩序,但本質上只係繼續厚黑,韜光養晦,等待百年馬拉松之後嘅復興時機。呢段時間,香港依附喺英美保護罩之下,尚算毛髮未損,但中共滲透近在咫尺,一直喺地下發揮影響力,香港處境從未稱得上為安全。

中共以極權體制立國,以黨國思維統治,模式七十年以黎從未轉變。無論現今執政者係咪習近平,中共嘅總路線都係以中華帝國姿態崛起,消解人類文明嘅進步里程。所以,只有迫令中國改弦更張,亞洲嘅小國至有呼吸自由嘅空間,而自由陣營嘅邊界先至得以擴張。太平洋島鏈嘅最後一個據點,並唔係台灣,而係可以重擊中國嘅香港,台灣只係一隻已經入陣嘅牌,大家角色從來不一。國共內戰之後,國民黨敗走台灣,價值為保留中華民國之名義,準備隨時反攻大陸。然而,由於美國拉攏中國,對付蘇聯,自尼克遜訪華後,中華民國價值稍為下跌,國際地位亦一直下降,台灣邦交國數量一直減少,就係美國選擇培養中國為可靠盟友嘅結果。好彩嘅係,習近平執政,一改前人策略,急於求成,一度倦勤疏懶嘅美國就猛然驚醒,發現蘇聯雖亡,中共尚在,要鞏固自由陣營,就必須擊敗中共。擊敗中共之後,中國可以潰而不崩,各省獨立可以,聯邦自治可以,只要中共唔再妄圖重現中華帝國嘅光輝,倒行逆施,美國就會放佢一馬,而人類文明亦可以繼續向自由之路進發。

人類文明嘅必然方向係自由,而香港振作,就可以突破缺口,改寫歷史。只有香港獨立,中共倒台,中華民國紙牌先至可以退出歷史舞台,而亞洲大局既定之後,台灣就可以正名獨立,告別中華餘毒。中華文化以儒家文化為宗,其內涵之所以妨礙人類文明發展,在於成套文化係以安定社會而設,並非鼓勵所有人伸張自我。所謂倫理,其實乃係由上而下推動嘅思想操縱,儒家文化從來唔鼓勵人類挑戰制度,獨立思考,如同古埃及嘅社會階級,不合情理偏又行之有效——法老君權神授,王位世代相傳,以中央體制掌管全國,役民不息。成個古埃及社會嘅秩序以武力為基礎,掌有武力者則稱王,如同中華帝國興衰交替,從來不脫武裝起事;貴族祭司壟斷知識,士兵軍人專職護國,如同中華帝國體制之中嘅皇親國戚以及元帥將軍,服務對象係皇室而非社會;知識分子抄寫記數,農民工匠負責生產,如同中華帝國社會內自命不凡嘅士大夫,以及千千萬萬目不識丁嘅貧農,只可以跟從巨輪滾動,永不超生。呢種社會模式,喺人類文明歷史上持續千年,喺唔同地區都有所發展,進程同樣都係由部落步向小國,然後由小國步向帝國,因為只有不停擴張規模,帝國嘅生命力至得以維持。過去,地球尚有大量未開發地方,帝國擴張未有邊界,但大航海時代之後,地球全面開發,文明之間衝突無日無之,要徹底解決國家之間嘅矛盾,已經唔再可以只憑武力,所以自由協商,部落共治,又再回歸人類眼前。

儒家思想,本身就係一種支撐帝國模式嘅落伍思想,喺全人類都已經認識到自由可貴嘅廿一世紀, 理應封存,鎖入博物館櫥窗。可惜嘅係,香港人一直都察覺唔到儒家思想嘅荼毒,一再自誤,以中國人自居,自困於舊世界地圖之上,進退維谷。儒家思想嘅核心價值係反對自由,西方文明嘅核心價值係自由最高,香港號稱中西合壁,以便利華洋共處而自豪,本身就係近乎精神分裂。一部電話,只可以裝蘋果嘅iOS,或者GoogleAndroid,貪多務得,兩邊落注,只係為中國拖延時間,消耗人類文明能源。而事實上,由一八四二年起,香港就已經唔係舊世界嘅一員,而係用緊自由陣營系統運作嘅準自由城邦。香港受英國殖民統治,由一開始以自由港自我定位,再發展出後來嘅司法獨立,都係履行緊西方文明嘅秩序,即使機件仍然不褪中華氣味,系統已經由頭重置,無法同中國兼容。正因為系統唔同,對自由嘅理解唔同,由香港落入中共手上開始,其實就已經係為日後嘅系統衝突埋下伏線——只要香港人鼓起勇氣,回復原廠設定,爭取獨立,就可以加入自由陣營,而中國亦會因為香港嘅分離,而必須正視自身系統嘅致命缺陷,繼而抉擇放棄中華帝國春秋大夢,抑或一意孤行對抗世界。香港獨立,係刺激中共,更係提醒台灣及早排毒,全速向正途進發。

所以,「今日香港,明日台灣」嘅真正意義,在於共同經營太平洋島鏈,封鎖中國,制止中華帝國破壞亞洲均勢嘅惡意。只要香港堅持獨立,寸步不讓,美國就會鼓動日本台灣南下支援,而中共滅亡,台灣以至新疆西藏,都可以擺脫魔爪,重新上路。如果香港留戀中國城市嘅身分,拒絕自立,而中國野心不息,出兵台灣,屆時台灣就要出兵還擊,死傷在所難免。而由於世界無法承受全面開戰,美國未到最後關頭都無意出動,中華民國名義就會派上用場——兩個中國對戰,日本毋須入局,美國自可隔岸觀火,直至台灣失守。明乎此,香港要掙扎求存,首先就要自我解殖,拒絕中華帝國嘅不義遨請,然後就可以協助自由陣營解放亞洲,繼而推動人類文明走向更自由嘅下一階段。以武力解決問題嘅手段,經過兩次世界之戰,已經證明此路不通,戰爭再度爆發,所影響嘅係全人類嘅福祉。

香港人必須記住嘅係,香港獨立,要付出嘅成本其實非常之小,因為自由陣營所植入嘅系統,早已根深蒂固。雖然香港已經倒退為反殖社會,但只要獨立,公民社會就會即刻復活;雖然香港警察已經淪為當權者走狗,但只要獨立,治安就會井然有序;雖然香港法治已經搖搖欲墜,但只要獨立,司法機關就會馬上可用。其他國家獨立之後,重建之路相當漫長,但香港得天獨厚,獨立之路,只要把握時機,果斷起步,就已經贏咗一半。

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s