香港民族要做嘅，唔係向警隊宣戰，而係積極鞏固共同體內部連結，以及加強自我防衛能力。因此，宣言可取之處，在於提出全體先退到海外休整，徐圖後計，而且顯示出將會建立民兵之決心，呢啲都係同未來香港流亡政府路向必然契合嘅決定。然而，宣言中提到希望提供「清晰的戰略論述，來帶給香港人希望」，以及批評文宣無用，則有待商榷。
的而且確，共產黨係以文宣起家，但所謂文宣起家，講緊嘅唔係派傳單，而係理念先行。蘇共中共之核心理念，係列寧恐怖主義，統戰工作同埋暴力鎮壓只係宣揚理念嘅手段。階級太闊太虛弱，共同體想像無法成形，民眾自然從來無法團結，而共產黨深明此道，所以就一直以階級淡化社會自然生成之人際關係，例如家人及朋友之紐帶，以達致集權。以為同中共以武力對決至係致勝之道，可謂對歷史近乎無知。
宣言之中，我見到撰寫人引用美國總統列根總統之言：「自由人嘅堅定意志，比武器更加強大」，但根據前文後理，撰寫人似乎並唔理解列根以至美國人想要表達嘅意思。美國人清楚知道，槍炮本身只係死物，真正有意義嘅係以槍炮所捍衛嘅正義，所以企喺正義一方嘅人，只會以槍炮自衛，而唔會以槍炮製造恐怖主義，伏擊平民，因為咁做就無異於自我降格為同中共同等嘅低等生物。所以，美國之所以比蘇聯強大，以及將會促使中共崩潰，正係在於美軍出師必然有名，只會將槍炮用喺正當嘅地方，而非同蘇聯鬥玩暗殺。
而「中國人同香港人一樣，百年來都不是以武力見長，中共建國以來，軍事反而一直是弱項，文宣才是最強項」之說，亦係缺乏理論支持。不論呢句講緊嘅係人種之基因，定係武風之強弱，其實都唔係對抗中共嘅關鍵，因為中共軍事之所以係弱項，完全同本身中國人係咪以武力見長無關。中共之強，在於可以操縱人性，分裂大小共同體，繼而顛倒世界原生秩序，我地唔知道對方可以掌權嘅真正原因，係唔會有效消滅對方。中國人社會人人自危，互相猜忌，至係中共可以用少量武力就足以維持管治嘅原因，而中國人文化點解特別適合共產主義落地生根，梁啟超發明嘅中華民族有幾脆弱，至係我地要思考嘅事。
1898年，滿清百日維新失敗，失勢一方流亡海外，開始諗其他方法「救國」。研究歐洲嘅民族主義之後，所謂改革者發現自己「國家」只有朝代，而無國名，於是就喺1902年首創中華民族一詞，然後求其咁話多民族混合而成嘅都可以叫民族，漢滿蒙回藏溝埋做瀨尿牛丸呀笨就此成為新論，炙手可熱。四大文明古國之說，都係由佢自由心證咁亂寫出黎。
其實所謂中華民族，係發明得好馬虎，根本經唔起時間考驗。然而，因為好多以革命家自居嘅人好想推翻舊帝國奪權，急於尋求接軌現代文明嘅捷徑，於是某知名革命家就即刻借用呢個概念——值得留意嘅係，呢位革命家起初係呼籲大家「驅逐韃虜，恢復中華」，即推翻滿清，恢復漢民族國家，只係聽完他人討論，又覺得民族融合、民族團結同民族平等呢啲講法更加煽動人心，於是就提出「五族共和」理論，令中華民族多民族共同體呢個概念漸漸深入人心。經不求甚解嘅中國知識分子加以發揚之後，呢啲草率壓縮而成嘅矛盾講法，就成為後來中國人嘅共識，亦為中國共產黨所繼承，流傳至今。
而多民族共同體都可以洗腦成功，則係多得當時俄國輸出革命。中華民族唔夠力，但滿清治下，窮人眾多，無產階級積極求存，於是就對無產階級團結相當有反應。於是，中華民族狐假虎威，利用無產階級渴望政治分贓之心，時機可謂天衣無縫。中國人對於新理論新概念從來都係囫圇吞棗，不經消化即加以採用常見，扭曲學說以自我保護更常見，大乘佛教同佛陀學說之距離，正係例子。
以上嘅所謂改革者，就係梁啟超康有為，而熱衷政治嘅革命家係邊個，亦不言自明。民族概念同身分認同從來都係人為發明，但可唔可以歷久常新，就視乎共同體內部係咪可以不停更新概念，所以輕視理念，只重武力，香港人係絕對唔會獲勝。而毛澤東所講嘅黨指揮槍，其實就係講軍事力量係要同政治理念結合，如果香港民兵主事者缺乏真正清晰嘅政治認知，就好有可能令香港人避唔開未來同中共玉石俱焚之下場，令本應可以逃過一劫嘅平民無辜受罪。
其實，美國之所以唔輕易出兵，正係因為佢地以輿論同經濟手段就足以圍堵中國，當年對付蘇聯，都係一樣。共產社會本身有重大缺陷，從內部開始崩潰係遲早嘅事，根本毋須操之過急，以身犯險，得失美國國民。中國人經歷文化大革命，對家人朋友都失去信任，無法如同香港人一樣建立互信，成個社會都係一盤散沙。精英全力出逃，平民無心護國，只要經濟一差，中共就會失去統治地位，中國亦會陷入分裂，重複中國歷史循環，呢啲美國自然清楚。故此，喺中共試圖挽狂瀾於既倒嘅存亡關頭，香港無法自外於亂局，自然要靠自己武裝自衛，減少死傷，但要求美國參與，美國係一定唔會，因為美國唔想好似當年越戰咁引起國內民情反彈——他國人民性命，有乜理由要求美國人以死相助？
我非常尊重武士軍人，但我從未見過成功嘅軍人，係會貶抑政治家之語為長篇大論低級文宣，或者睇唔起有力著書立說嘅學者專家。要發明香港民族，有三類人比軍人更為重要，軍人只係為保衛可以產出以下三類人嘅民族而有存在必要——首先要有品德高尚而又有一定才學嘅人，簡而言之就係具備視野嘅政治家。其次就係有能力寫出香港民族史詩嘅人，因為世人普遍都係需要情感扣結，文藝作品就係確立香港文化自成一系嘅關鍵。用粵文寫作，寫香港人嘅故事，絕對有助民族主義發展，因此我地需要文學家。最後就係有能力重塑香港歷史嘅人，因為較有理性嘅人需要實證主義，有人可以證明香港民族歷史確實存在，就可以化解中共洗腦術。史在人為，寫好就可以拎黎對抗中國中心論述，呢樣其實已經有人做咗，但歷史論述，永遠都係多多益善。如果有人輕視以上三類最有價值嘅人，以為武力高於一切，只會將香港民族推向更惡劣境地。
各司其職，係勝利嘅關鍵，所以建立民兵係好重要，但我必須再次指出，要做英雄，唔係只有斬人至得。我地香港人係一個共同體，批評其他人「嘴炮功夫世界第一」係唔會令大家更團結。我地香港人文宣從來唔弱，正正係因為我地理念一開始就比中共強——我地爭取自由，我地建立民族，我地會為自己人而戰鬥至死，但中國人係絕對唔會有呢啲諗法。登報嘅成效真係好低，呢點我完全認同，但築人鏈呢啲抗爭模式低成本高效益，點解唔值得做？擅長運用武力嘅就負責從軍，唔需要強求其他人跟你全民皆兵，因為每個人嘅專長都唔一樣，放棄自身優勢係極之不智。要留前鬥後，就要所有香港人都盡力精進自身，發揮所長，等到香港民族前景漸入佳境，大家就會知道一切都係多得合情合理嘅分工合作。
最後，我再補充一點，關於移民。已經有堅定建國意志嘅各位，請盡早離開香港，準備以海外香港人身分為國效力，去軍訓又好，去做啲小生意又好，最緊要係諗清楚自己嘅價值同定位。未來十年，中國同香港都會死好多人，流好多血，反送中只係前菜，但等到大震盪過後，就會係我地翻身之日。如果大家不幸殉國，或者畀人移送去中國監獄，你只會畀人活生生折磨而死，直至由香港國民政府著手進行轉型正義之前，都唔會有人為大家主持公道。
Facebook呢道我會越黎越少用，有心人唔使擔心我係咪畀人拉，我寫得唔密，只係因為要向香港民族內部傳達嘅訊息，已經發放得七七八八，要明嘅睇返舊文就已經會大致明我想講乜。而家大家應該做嘅，就係遠離建制，建立組織，其他乜都係一動不如一靜。
呢篇宣言有好多可以改進嘅地方，亦有唔少唔寫好過寫嘅部分，但從中我睇到撰寫人不畏艱險之義勇，亦絕對相信廣大同胞睇完，就會日漸意識到民兵係不得不做。民族要有理念支撐，亦要靠武力保護，呢點係香港人必須盡早理解嘅事實，所以反對武力係完全不切實際，但主張運用武力而忽視政治家之見，亦係同樣不切實際。對抗中共唔係一小撮人嘅事，亦唔係香港台灣嘅事，而係成個東亞以至世界嘅事，所以大家一定要通力合作，共同精進，為真正嘅戰功同榮耀而奮鬥落去。
逆嘶亭 