光復元朗,更要光復香港

光復元朗,如果有所謂圈套會中,圈套並唔係政府將會如何抹黑民眾無視法紀,而係浪費寶貴體力,自貶身分。過往皇家香港警察因守護自由主義而存在,因此與只知動武嘅原居民黑社會誓不兩立,但如今中共接管警隊,香港警察已經唔再係文明社會嘅象徵,同原居民通力合作,就係因為兩者本質相同,不妨同流合污。所以,只有集中火力,繼續批評警察淪為政治工具,自由香港至有立於不敗之地嘅籌碼。

同原居民混戰,就算大家勇猛有餘,打到對方落花流水,都唔會彰顯公義,原因係我地一但落入中共陷阱,就會倒退至原始秩序,自亂陣腳。香港開埠之前及初期,原居民自組團練,是非對錯視乎邊個拳頭大,武力凌駕於一切,但有咗司法機關同執法機關之後,文明秩序開始輸入,香港就唔再係鬥黑鬥爛嘅社會。雖然當初兩大機關未有互相制衡,但經過百年演化,皇家香港警察負責保障香港市民人身自由,已成常識現實,而香港人信賴警察,亦即係信任緊掌管警察嘅港英政府。

七十年代,皇家香港警察貪污腐化,葛柏案轟動一時,香港人亦曾對警察相當反感。然而,正因為港英政府成立咗廉政公署,有力喺體制內消化警隊失德現象,警察形象得以挽回。起初,香港人對港督未有太大期望,因為港英政府反貪行動治標不治本,往往以失敗告終,但係由於廉政公署係直接向港督負責,而且獨立於公務員體系,結果港英政府逐漸重建威信,而香港警隊亦成為亞洲區內其他國家紀律部隊嘅參考對象。

九七主權移交之後,皇家香港警察順理成章由中共接管,香港警察嘅核心政治任務就唔再係捍衛自由,而係製造恐懼。香港警察本身為香港人服務,行使武力嘅權利,理應由法律所賦予,不容濫用,因此,當警察已經唔再係正義之師,佢地執法嘅權利亦應當立即解除,因為社會需要警察呢個講法,已經完全站唔住腳——佢地違背法治精神,遺忘維護市民自由人權之神聖任務,根本唔配領取由納稅人負責支付嘅高薪。

於是,空有武力而缺乏理念嘅警隊,同空有武力而唯利是圖嘅原居民,自然一拍即合。中共同原居民交換利益,允許原居民繼續保有丁權丁地,而原居民就自發充當政治打手,呢種赤裸武力嘅呈現,就係中國國內每日發生緊嘅叢林血戰。假如抗爭對象由警察轉移至原居民,中共暴行就會因而淡化,而自由陣營就會誤以為香港人已經忘記捍衛自由至係運動可以延長至今嘅根本動力。

相比起警察,原居民其實更加係抗爭者嘅同路人,因為某程度上,原居民都係為勢所迫。中共擅長煽動群眾鬥群眾,由三反五反,到整風活動,再到十年文革,全部都係挑動階級對立嘅結果。原居民習慣特權,無法覺醒,我地同佢交惡,只會互相傷害,但警察係體制嘅延伸,我地同佢對抗,就係崇高理念與原始武力之爭。戰爭要出師有名,光復元朗,未必係壞事,但亦未必係最值得做嘅事,因為自由永遠都係高於正義。

香港要加入自由陣營,就要確保世界知道香港人夠聰明,從來都睇得出警權同自由嘅關係,而非橫衝直撞,任意發難。自由人權係限制原始武力嘅必殺技,放棄自由人權呢個道德高地,運動就會失勢,中共就會如願以償,然後美國就會缺乏理由伸出援手。原居民四出作惡,大家心頭之恨難以發洩,大可以對原居民小懲大戒,但必須記得嘅係,針對警察濫權失能,比狙擊原居民更有意義,因為只有緊咬警察唔放,至會表達到香港人追求自由嘅堅定決心。

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s